Boahtte vahkkoloahpa lea fas njoarostangilvu Dávgeváris Suomas, gosa olu Norgga beale sápmelaččat mannet. Lágideaddjit lohket ge vuordit eambbo Norgga beale sápmelaččaid gilvvuide, maŋŋil go kárášjohkalaš Nils Máhtte R. Eira vuittii diibmá.
Boahtte vahkkoloahpa lea fas njoarostangilvu Dávgeváris Suomas, gosa olu Norgga beale sápmelaččat mannet. Lágideaddjit lohket ge vuordit eambbo Norgga beale sápmelaččaid gilvvuide, maŋŋil go kárášjohkalaš Nils Máhtte R. Eira vuittii diibmá.
Boahtte vahkkoloahpa lea Taigafestivála Dávgeváris, Suomas. Doppe lágiduvvo dál njoarostangilvu goalmmát háve.
Álgogilvvut leat odne, ja bistet olles lávvordaga. Sotnabeaivvi lea finála.
Vurdet Norgga beale sápmelaččaid
Diibmá vuittii kárášjohkalaš Nils Máhtte R. Eira njoarostangilvvu, ja nu faskii áibbas ođđa njealjejuvllaga.
Lágideaddji Marko Touro lohká sin vuordit eambbo Norgga beale sápmelaččaid gilvvuide dán jagi, danne go diibmá vuittii norgalaš. Son dattetge ii sáhte muitalit juste logu gallis dássážii leat dieđihan gilvvuide.
Diibmá ledje oktiibuot 63 gilvaleaddji gilvvuin, gos 32 besse loahppagilvvuide. Nu go diibmá ge, de lea dán jagi maid njealjejuvllat vuoitun njoarostangilvvus.
Govven: Petra Biret Magga-Vars (vuorkágovva)
Sirdán festivála
Lágideaddji Marko Touru muitala Ávvirii sin sávvat boahtit liikká olu gussiid go diibmá ledje Taigafestiválas. Diimmá festivála lágiduvvui geassemánus, ja dán jagi leat sirdán suoidnemánnui.
– Váikko leat olu eará doalut juste dál, de mii goit ge sávvat ahte bohtet olu guossit. Mii sirddiimet festivála suoidnemánnui go áigguimet hukset buoret festivála iežamet gussiide. Boahtte jagi lea festivála fas geassemánu.
Olu dáhpáhusat
Njoarostangilvu lea nuvttá gehččiide. Gilvui sáhttá ovdagihtii dieđihit, dahje sáhttá dalle dieđihit go lea doppe.
Dávgeváris dáhpáhuvvá olu dán vahkkoloahpa, go seammás go festivála lea, de leat maid geassemárkanat. Geassemárkaniin leat báikki duojárat ja biebmodahkkit vuovdime iežaset gálvvuid.
