Álttás ballet koronavirusa delta-variánta njoammut, ja danin sihtá suohkan olbmuid čađahit koronaiskosa jus leat leamaš dihto báikkiin.
Maŋŋel go guovtti eará gieldda olbmos duođaštuvvui koronavirus maŋŋel go leigga mátkkoštan Áltái, de leat ballagoahtán ahte Áltái lea ollen delta variánta.
– Guovllus gos mátkkálačča guovttos leaba boahtán leavvá delta variánta, ja danin ballat ahte dat lea njommon Áltái, dieđiha sátnejođiheaddji Monica Nielsen preassadieđáhusas.
Bearjadaga ávžžuhii Álttá suohkan olbmuid čađahit koronaiskosa jus dovdet dávdamearkkaid ja jus leamaš dihto báikkiin dihto áiggis. Maŋŋel go ballagohte delta variánttas, de suohkan vuordá ahte olbmot isket lea go sis koronavirus jus leamaš seamma sajiin go koronabuohccit.
Leat go dáid báikkiin fitnan?
– Jus leat leamaš Peppes Pizzas mannan gaskavahkku dii. 16.00-18.00, Gabo báras gaskavahkku dii. 20.30-22.00 dahje Barilas gaskavahkku 18.30-20.30 ja 22.00-00.00, de diŋgo áiggi čađahit koronaiskosa. Mii háliidat ahte buohkat geat leamaš dáid báikkiin isket lea go sis koronavirus go delta njoammu jođáneappot go eará variánttat, dieđiha Álttá suohkan.
Álttá suohkanis čađahit koronaiskosiid sotnabeaivvi. Lávvardagaid ii mana girdi Romsii ja danin ii leat vejolaš iskosiid sáddet guorahallamii. Álttás diŋgot koronaiskosa teakstadieđu bokte, telefunnummir lea 59 44 45 61.
– Álttá suohkanis lea čielga diehtu olbmuide. Ráddjejehket lagas oktavuođaid ja diŋgojehket áiggi koronaiskosii jus dovdabehtet makkár ge dávdamearkkaid, dadjá Nielsen.
Álttá suohkanis ledje bearjadaga maŋŋelgaskabeaivvi 8 olbmo isolašuvnnas ja 21 olbmo erremis.
