Lappi buohccedikšunguovlu ráhkkana dál juovllaide go olu turisttat mátkkoštit Davvi-Supmii.
Sámi gielddain leat dušše moadde ambulánssa Lappi buohccedikšunguovllus ja juovllaid áigge láve fáhkkabuohccedivššus hušas áigi, čállá Yle Sápmi. Suoma bealde Lappi guovllu fáhkkabuohccedivššu hoavda Panu Karjalainen čilge ahte sii leat bures ráhkkaneame ja pláneme divššu.
– Mii plánet ahte lea olles Lappi buohccedikšoguovllus fáhkkabuohccedikšu, ja doaibmat Ranuas gitta Ohcejohkii. Mii sirdit dearvvašvuođabargiid dohko gos sii dárbbašuvvojit.
Koronaáigi ja juovllat
Juovllaid áigge láve hušas áigi go olu mátkkošteaddjit bohtet Davvi-Supmii ja dál lea vel koronadávda mii njoammu.
– Berre váldit vára nuppiin, ja juovllaid áigge fáhkkabuohccedivššu barggut lassánit turisttaid johtima geažil maid. Mun duođai sávan ahte dán koronapandemiija áiggis mii buohkat geahččalit váldit vára nuppiin vai divššu ja fáhkkabuohccedikšumiid barggut eai šatta menddo olu. Sávan ráfálaš juovllaid, loahpaha Suoma bealde Lappi guovllu fáhkkabuohccedivššu hoavda Panu Karjalainen.
