Felleskjøpet háliida boanddaide veahkkin, ja viiddidit dál iežaset fálaldaga.
Ovttasbargu gaskkal TINE, Nortura ja Felleskjøpet Agri stuorru ja viidu eambbo. Dán vahkku servet guhtta ođđa Felleskjøp-ossodaga ovttasbargui, ja álget vuovdit boanddaid buktagiid buvddain.
– Dá lea oassi min rahčamušas ahte boanddain galgá leat vejolaš vuovdit iežaset gálvvuid buvddas. Mii vuovdit jo diŋggaid maid boanddat dárbbašit vai sáhttet buvttadit biepmuid, dál mii ges háliidit veahkkin boanddaide vuovdit buvttaduvvon biepmuid buvddas, dadjá Felleskjøpeta konseardnadirektevra Trond Fidje preassadieđáhusas.
Ođđa ossodagat vuovdigohtet
– Midjiide leat olu gažaldagat boahtán, sihke boanddain ja kundariin, goas mii álgit vuovdit biepmu min buvddain. Dál mii iluin sáhttit bovdet olbmuid iežamet buvddaide, gos ožžot buori fálaldaga dál, muitala Volda buvdajođiheaddji Hilde Kristin Haugen preassadieđáhusas.
Skábmamánu 10. beaivve bovde son ja su mielbargit ođđa biebmoossodahkii, gos besset máistit iešguđetlágan biepmuid. Sis lea erenomáš beroštupmi vuosttáide ja spihkebirgui.
2021 giđa leat moatti Felleskjøp-buvddat leamaš prošeavttas mielde, gos mihttu lea leamaš fállat biepmu man boanddat buvttadit. Dál leat eambbo buvddat mielde prošeavttas, maiddái davvin.
Olu válljenvejolašvuođat
Geahččalanprošeakta jođii bures. Olbmot oste dalle iešguđet biergobuktagiid ja vuosttáid.
– Bassináigodat lea nohkan, ja dan dihte mii háliidit fokusa bidjat spihkebirgui, mii heive erenomáš bures vuosttáide maid mii maid vuovdit. Mii áigut váldit sisa eambbo spihkebierggu Norturas, ja vuosttáid ges TINE:s, muitala oassejođiheaddji Trude Maurset Høgheim.
Iskkadeamit maid Felleskjøpet lea čađahan čájeha ahte biebmofálaldat lea bivnnuhis fálaldat. Guđas juohke logi kundaris ostet biepmu.
