Lobihis fierpmádat lea vuovdán gonagasreappáid miljovnnaid ovddas.
Finnmárkku politiijat leat fárrolaga ØKOKRIM:in almmostahttán fierpmádaga maid sii oaivvildit leat lobiheamet bivdán ja vuovdán gonagasreappáid miehtá Norgga. Gonagasreabbát galget leat bivdojuvvon Nuorta-Finnmárkkus ja vuvdojuvvon Lulli-Norgii. Lea sáhka gonagasreappás mas lea lonuhanárvu máŋggaid miljovnnaid ovddas, čállet Finnmárkku politiijat preassadieđáhusas.
Politiijat leat váldán gitta olbmuid fierpmádaga juohke dásis, sihke bivdiid ja vuvdiid. Politiijat leat bargan almmustahttimiin ja kártemiin guhkit áiggi badjel.
– Máŋggas sis geat leat áššáiduhtton leat Nuorta-Finnmárkkus eret. Finnmárkku Politiijat árvvoštallet háldogiddagassii bidjat guoktása geat leaba áššáiduhtton. Lassin dan akšuvdnii Finnmárkkus lea ØKOKRIM váldán gitta olbmuid geaid politiijat oaivvildit leat distribueren ja vuovdán gonagasreabbá viidáseappo, dadjá Finnmárkku Politiijaguovllu politiijaadvokáhta Are Aarhus.
Politiijat leat ožžon ollesgova movt fierpmádat leat vuovdán reappáid ja geat dainna leat bargan. Čakčageasi maid duoguštedje politiijat lobihemiid bivdojuvvon gonagasreabbaid mat čadnojit namuhuvvon fierpmádahkii.
– Dát lea duođalaš ášši. Dát lea roavva organiserejuvvon biraskriminalitehta ja dat lea roavva ekonomalaš kriminalitehta, dadjá Aarhus.
