Norggas leat vuovdán valjis ruovttuiskosiid maŋimuš guokte vahkku.
Eai goassege ovdal leat vuovdán nu olu koronaiskosiid go mannan vahkkus. Dalle johte Norgga apotehkain 605 000 ruovttuiskosa. Ovddit vahkkus ges vuvde 400 000 ruovttuiskosa. Dat mearkkaša ahte norgalaččat leat oastán 1 005 000 koronaiskosa maŋimuš guokte vahkku, čájehit Apotekforeningen logut maid P4-ođđasat leat háhkan.
– Mii leat guhkit áigge vuovdán valjis ruovttuiskosiid, dain lea seamma buorre johtu go varas láibbiin, lohká Apotekforeningen gulahallanhoavda Jostein Soldal.
Muhtin ráje apotehkain leat vuovdán buot koronaiskosiid. Apotek 1 gal dieđiha ahte sis leat ain olu koronaiskosat vuorkkás. (©NTB)
