Vuot Norggameašttirin njoarosteamis

Lákkonjárgga Mikkel Andreas Eira čájehii otne, ahte son lea birgetmeahttun njoarosteames maŋŋá go vuittii nuppis Norggameašttirgilvvu njoarosteames. GEAHČA MAIDDÁI FILMMAŽIID ÁŠŠI LOAHPAS

Otne ledje njoarostan Norggameašttirgilvvut gávpotguovddážis Romssas, ja Lákkonjárgalaš Mikkel Andreas Eira ja Unjárgalaš Tonje Kristine Nilssen leaba čájehan dán jagi ahte soai leaba Norgga buoremus suohpangieđat.

Diimmá Norggameašttir Mikkel Andreas Eira ražaige gaskagilvvus ja masa časkkahallá olggus, muhto nagodii beassat loahppagilvvuide. 

  – Jurddahallen beare olu, nu ahte goasii časkkahalan olggus. Soittii eambbo deaddu mu alde go diibmá vuiten, dadjá Eira. 

Son searvái gilvvuide nuppes ja leage goappašat gerddiid vuoitán dál. 

– Lean hui duđavaš dál, buorre dovdu, dadjá Eira.

Nissonluohkás vuittii fas Tonje Nilssen guhte logai ovdal gilvvuid iežas oabbái bággehallan searvát. Maŋŋá gilvvu son stuorra mojiin giittii oappá Lone Nilsen guhte bođii goalmmádiin.   

– Dál gal in gáđa veaháš ge go serven, čaibmá lihkolaš vuoiti Tonje Nilssen. Son ii leat ovdal vuoitán ja muitala leige su vuorru dál.

Almmáiolbmoluohká vuoitit:

1.Mikkel Andreas Eira

2.Isak Anders Eira

3.Johan Ailo Gaup

4.Johan Martin Eira

Nissonluohká vuoitit:

1.Tonje K. Nilssen

2.Kirsti Monica Eira

3.Lone J.Nilssen

4.Inger Marie Eira

Njoarostangilvvus ledje mielde 21 almmáiolbmo ja 6 nissona.

Dás oainnát movt dát lei. GEAHČA FILMMAID