-Almmuhus-
-Almmuhus-
-Almmuhus-
OĐĐASAT– Vuošváretunealla lei heaggaváralaš

– Vuošváretunealla lei heaggaváralaš

-

-

Stáhta iežas riskaguorahallan čájehii ahte Vuošváretunealla lea hirbmat váralaš, liikká gesse sii iežaset ruhtadeami ruovttoluotta. – Mii fertiimet hoahpus ruhtadit divodeami maŋŋil go fylkkamánni oaččui ovddasvástádusa Vuošváretunealla ovddas 2009:s, dadjá Tromssa fylkkaráđđi reivvestis departementii.

Vuošváretuneallaášši bohciidii das go Gielda- ja ođasmahttindepartemeanta njukčamánu 2. beaivvi dán jagi sáddii reivve Tromssa fylkkasuohkanii mas lohket ahte fylkkageainnu 868 divodeapmi, Vuošváretunealla divodeapmi, lea dábálaš doaibmabargu fylkkagildii.

Departemeanta čállá ahte danne eai lean galgat juolludit 15 miljovnna RUP-ruđain (regionála ovdánahttinruđat) tunealla divodeapmái, ja ahte fylkkasuohkan sáhttá dál šaddat máksit dáid ruđaid ruovttoluotta.

 

Riikka vearrámus geaidnu

Dál lea Tromssa fylkkasuohkan sádden iežaset vástádusa departementii. Das čujuhit ahte Stáhta ieš 2009:s, go Vuošváretunealla ain lei stáhta hálddus, juolludii 12 miljovnna ruvnnu buoridit dán váralaš tunealla. Stáhta iežas riskaguorahallan dalle čájehii ahte lea hoahpu divvut dán tunealla man gohčodedje hirbmat váralažžan.

Stáhta geaidnodoaimmahaga siskkáldas áviissas «Vegen og vi» nammaduvvui maid Vuošváretunealla riikka vearrámussan 2008:s.

Geaidnodoaimmahat dattege ii geargan geavahit dáid ruđaid ovdal go stáhta, hálddašanreforpma bokte, sirddii geaidnoovddasvástádusa fylkkagielddaide.

– Nu jávkkihii ge maid dat ruhtadeapmi man ledje juolludan divodit dán geainnu, geaidnu dattege ii šaddan sihkkareabbon olbmuide. Danne mearridii ovttajienalaš fylkkadiggi 2011:s ahte galgá juolluduvvot 15 miljovnna RUP-ruđain dasa maid gohčodeimmet riskaeastadeaddji ja riskageahpedeaddji minimumčovdosin, dadjá dearvvašvuođa, kultuvrra ja ealáhus fylkkaráđđi Tromssas, Willy Ørnebakk (Bb).

Sihke fylkkaráđđi ja fylkkadiggi čujuhedje dasa ahte báikkálaš olbmuin ja ealáhuseallimis lea stuorra dárbu dorvvolaš fievrredanluddii.

 

Hirbmat váralaš

– Midjiide Tromssas, geat oktanas leimmet stáhtas ožžon ovddasvástádusa máŋgga ođđa geidnui mat ledje heaju, de leimmet dakkár dilis gos leimmet šaddat árvvoštallat giddet geainnu jus eat lean dákkár hohpolaš mimimumdivvuma dahkat. Dan ii sáhttán regiovdna dohkkehit. Ja dás lea maid dehálaš lasihit ahte lassin dan 15 miljovdnii mat bohte RUP-ruđain, vieččai fylkkagielda vel 41 miljovnna iežamet bušeahtas go stáhta ieš lei geassán ruovttoluotta daid ruđaid maid ledje juolludan Vuošváretunellii, dadjá Ørnebakk.

Fylkkaráđđi čujuha iežas vástádusas gieldadepartementtii, ahte fylkkasuohkan easka 2011:s oaččui Stáhta geaidnodoaimmahaga riskaguorahallan-raportta, mii konkluderii ahte tunealla lea «hirbmat váralaš». Dan konkluderejedje dan vuođul go tuneallas ledje leamaš máŋga duođalaš lihkohisvuođa ja buollimat. Ledje maiddái leamaš máŋga bártti traileriiguin allodatráddjemiid geažil, mohkiid geažil ja dan geažil go váilot garvinsajit tuneallas.

– Fylkkasuohkanii lea dehálaš oažžut ovdan ahte dás lea sáhka heaggaváralaš tuneallas, mii seammás lea dehálaš Ivguservodahkii, sihke ealáhuseallima fievrredemiid ja ássiide. Dán geainnu gidden livččii dagahan dohkketmeahttun dili ealáhuseallimii, ja go stáhta gesii iežas juolludeami ruovttoluotta, de lei riekta geavahit regionála ovdánahttinruđaid dán erenoamáš doaibmabidjui, dadjá fylkkaráđđi Willy Ørnebakk.

-Almmuhus-