Norsk Luftambulanse vuođđudus ráhkada Norgga girdi laboratoria fáhkkatmedisiinnalaš dutkamis ja ovdánahttimis. Dál sávvet dainna gádjut eanet heakkaid.
– Mis lea pasieanta guovddážis. Mii bargat sin ovddas geat bahut roasmmohuvvet dahje buohccájit eará sajis go buohcceviesus, ja sii dárbbašit jođánis veahki ja máhtu doppe gos leat. Vai gávdnat vel buoret vugiid, geahččalit dutkama ja ávdnasiid, de galgat váldit atnui ođđa helikoptera, lohká Norsk Luftambulanse vuođđudusa váldočálli Hans Morten Lossius preassadieđáhusas.
Heakkaid gádjut ođuhiin
Juohke jagi dolvot 7000 pasieantta doavtterhelikopteriin. Lossius oaivvilda ahte veahkki fáhkkabuhcciide ja roasmmohuvvan olbmuide sáhttá buoriduvvot ja ollet jođáneappot.
Lossius oaivvilda ođđa helikopteriin bargat garrasit fáhkkabuhcciid áššis.
Son lohká eanet heakkaid sáhttit gádjut ja seastit gillámušaide ja lápmašuvvamiid dáfus go girdiambulánssas lea spesialhelikopter áimmus mii lea earenoamáš laboratoria dutkama ja ovdánahttima dáfus.
– Dát bargu čađahuvvo ovttas álbmogiin. Mis lea nanu doarjja, muhto dárbbašit álbmotveahki nagodit čađahit dan, lohká Lossius.
Vuosttaš geahččaleaddji
Dál eai gávdno sierra helikopterat mat leat biddjon dutkama ja ovdánahttima barggu várás, muhto dárbu geahččalit ođđa vugiid ja čovdosiid lea stuoris.
Dál ii leat leamaš dat vejolaš geahččaladdat maidege go buot doavtterhelikopterat Norggas, maid Norsk Luftambulanse AS doaimmaha, leat gearggusvuođas juohke beaivvi.
Dál rievdá dat, go Airbus Helicopters lea válljen Norsk Luftambulanse vuođđudusa leat vuosttaš kunddarin Airbus H145 geavaheaddjin, dieđihuvvo preassadieđáhusas.
