Offroad Finnmark gilvvu sihkkelastit leat dál Šuošjávrris ja Mázes. Dál leat sihkkelastime moala guvlui ja njunnošis leat golbma porsáŋggulačča.
Porsáŋgulaččat leat duorastat iđida ovddemusas Offroad Finnmark 700 Solo gilvvus. Vuosttažin lea Tor-Espen Jolma, gii lea juo Mázes duolmmastan Joatkka guvlui. Su ja earáid sáhttá čuovvut Racetrackeris.
Jolma lea mealgat ovddabealde earáid. Su maŋábealde leaba Evald Linløkken ja Stig-Ronny Nilsen, geat maid leaba Porsáŋggus eret. Soai leaba čáledettiin jođus Šuoššjávrái.
Offroad finnmark 700 joavkogilvvus leaba Team Eiker CK joavkku Tom Bergene ja Jan Kristian Haugnæss vuosttažin, ja soai leaba jođus Kárášjohkii Váljogas. Sunno maŋábealde boahtiba T&T, Trond Risvik ja Thomas Lium.
Prográmma mielde galget odne dii 18:30 joavdat mollii.
