Norleif Krokmo gottii vuosttaš gilvovahkku losimus luosa, ja son šattai ge vuosttaš vahkku Luossagonagassan.
Norleif Krokmo gottii vuosttaš gilvovahkku losimus luosa, ja son šattai ge vuosttaš vahkku Luossagonagassan.
Ávviris lea jođus oaggungilvu, mii bistá gitta suoidnemánu 31. beaivái. Juohke vahkkus vuoitá son guhte losimus guoli lea goddán dan vahkkus Luossagonagas dahje -dronnet gaibagahpira.
Vuosttaš vuoiti ollesolbmuid luohkás lea Norleif Krokmo, guhte lea oassálastán guvttiin guliin.
Geahppasat guolli dettii 7,6 kilo ja losit guolli dettii ges 14 kilo.
Son gottii goappašat guliid seamma ijas, geassemánu 24. beaivve čuovganeapmái silba Mørasild bastevuokkain.
14 kilosaš luossa lei losimus guolli dan vuosttaš vahkkus, ja maiddái losimus guolli obbalaččat dássážii, nu lea ge Norleif Krokmo njunnošis gilvvus, ja sáhttá vuoitit 3000 ruvnnu árvosaš skeaŋkakoartta.
(Ášši joatká gova vuolábealde)
Priváhtagovva
Ii leat ovdal goddán nie stuorra luosa
Krokmo finai eske Ávviris viežžamin iežas ođđa, eksklusiiva gaibagahpira ja lei ieš hirbmat duđavaš.
– Mun in leat ollesolmmožin goassege goddán nie lossa luosa, danne jurddašin ge ahte dál de searvvan gilvui. In leat goassege oassálastán ge dákkár gilvvuin ja de lei somá vuoitit, logai Krokmo.
Son leaikkastallá vel ahte sávvá dan njealji vahkkus go gilvu vel bistá, ii gotte oktage stuorát guoli go son.
Searvva don ge gilvui, it dárbbaš goddán losit guoli go Krokmo, go mii juohke vahkku nammadat ođđa luossagonagasa.
Son guhte losimus guoli goddá olles gilvoáigodagas vuoitá skeaŋkakoartta, muhto ii vuorbádat maid ovtta guhte vuoitá 800 ruvnno árvosaš oaggunstákku ja -veaskku.
Loga eanet gilvvu birra dáppe.
Vuittii oaggunstákku
Maiddái mánáide lea gilvu, ja mii vuorbádat vahkkosaččat muhtima guhte vuoitá oaggunstákku man FeFo lea sponsen.
Mánát besset oassálastit vaikke makkár guliin, beare ieža leat vuokkain goddán dan. Guoli sáhttá leat goddán vaikke mearas.
Dán vahkku «Guollelihkku» lei čiežajahkásaš Kevin Henrik Buljos, guhte oassálasttii 400 grámmasaš dápmohiin man lea goddán Čábardašjogas Guovdageainnus Toby bastevuokkain.
Mii sáddet sutnje oaggunstákku ja sávvat ain movtta oaggut!
VUITTII OAGGUNSTÁKKU: Kevin Henrik Buljo (7) vuittii vuosttaš oaggunstákku dán geasi oaggungilvvus. Priváhtagovva
