Miellačájeheaddjit, geat čatne iežaset gitta go vuosttaldedje ruvkebázahusaid gurremis Førdevutnii, eai leat dohkkehan sáhkuid maid ožžo dalle ja dál šaddet dikkis čoavdit ášši.
Miellačájeheaddjit, geat čatne iežaset gitta go vuosttaldedje ruvkebázahusaid gurremis Førdevutnii, eai leat dohkkehan sáhkuid maid ožžo dalle ja dál šaddet dikkis čoavdit ášši.
Disdaga skábmamánu 29. beaivvi álget vuosttaš diggeáššit dan ovcci akšunistta vuostá Fjordane diggegottis Førdes. Sihke Luondu ja Nuorat searvvi jođiheaddji Ingrid Skjoldvær ja Luonddugáhttenlihtu jođiheaddji Silje Ask Lundberg šaddaba diggái. Diggi bistá olles dán vahkku.
Sihke Oslos ja Førdes leat doarjjadoalut dikki oktavuođas gaskavahkku. Oslos lea spáiddarvázzin Stuoradikki lusa, ja Førdes lea doarjjakonsearta ja sátnevuorut.
250 miljovnna tonna merrii
Cuoŋománu 2015:s oaččui Nordic Mining lobi luoitit 250 miljovnna tonna ruvkebázahusaid Førdevutnii. Guovvamánus dán jagi ledje badjel čuođi miellačájeheaddji čađaheame jeagohisvuođa akšuvnnaid Førdevuonas. Dat 60 akšunistta, geat eai leat dohkkehan sáhkuid maid ožžo akšuvnna oktavuođas, fertejit dál boahtit diggái Førdes.
Luondu ja Nuorat vuorjašuvvan
– Eiseválddit čađahit biraskriminalitehta go dohkkehit ahte Nordic Mining oažžu lobi luoitit 250 miljovnna tonna ruvkebázahusaid Førdevutnii, mii lea okta dain divraseamos vuonain mas leat maid eanemus mearranálit. Váikkuhusat sullásaš bargguin eará vuonain vuorjašuhttet min garrasit, muitala Luondu ja Nuoraid jođiheaddji Ingrid Skjoldvær preassadieđáhusas.
Ii dieđe vel dohkkehivččii go unnit sáhku
Deanu nieida, Ane Margrethe Ugelvik, lei mielde akšunereme ruvkedoaimma vuostá guovvamánus ja biddjui giddagassii. Son ii ge leat dohkkehan sáhku maid oaččui ja lea vuordime gohččuma diggái.
– Mun rehkenasttán ahte dikki boađus dán vahkku čuovvu viidáset daid eará čuovvovaš dikkiid. Muhtimat doivot dikki mearridit unnidit sáhku sidjiide geat ledje vuosttažin akšunereme, ja dainnalágiin addit unnit sáhkuid earáide maid, ja beassat eret dan dikkis, muitala Ugelvik Ávvirii.
– In dieđe vel dohkkehan go unnit sáhku, ja áiggun smiehttat eanet dien birra, muitala Ane Margrethe Ugelvik gii lohká ahte ášši čielgá eanet maŋŋel duorastaga dahje bearjadaga go gerget dikkis Førdes.
Stuora mihtut 50 jagi ávvudeapmái
Boahtte jagi, 2017:s, deavdá Luondu ja Nuorat 50 jagi, ja sis leat garra mihtut:
– Mii áigut de vuoitit Lofuohta, Viestterállasa ja Sáččá guđát geardái, ja mii áigut hehttet Førdevutnii ja Riehpovutnii luoitit ruvkebázahusaid. Mii áigut maid váidit stáhta, ja dalle han lea stuoradiggeválga, čállá Luondu ja Nuorat Facebook-siiddustis.
