Áŋgiris luonddugáhttejeaddji ja ruvkevuostálasti Svein Lund lea gárven dál iežas vuosttaš girjji ruvkkiid birra.
Áŋgiris luonddugáhttejeaddji ja ruvkevuostálasti Svein Lund lea gárven dál iežas vuosttaš girjji ruvkkiid birra.
– Finnmárkkus ja eará guovlluin Norggas lea Ráđđehus moitojuvvon go dušše fokuserejit riggodagaid viežžamii, eai ge váldde doarvái vuhtii boahtteáiggi, birrasa ja eará ealáhusaid. Leat maid geahččalan duššindahkat Guovdageainnu suohkana hilguma golleruvkke ásaheapmái. Maiddái fágalaš rávvagat mat leat addon Nussira ja Førdevuonaáššiin leat duššindahkan.
Nu čallá Svein Lund iežas girjji birra ”Gull, gråstein og grums 1 – Omstridde gruver”, man Davvi Girji lágádus lea almmuhan dán vahkus. Girji lea ođđadárogillii.
Ruvkenákkuid birra
Girji lea viđa ruvkke dahje ruvkeplána birra maid birra Norggas leamaš eanemus gižžu. Okta ruvkkiin lea Biedjovákki veaike- ja golleruvke ja dan historjá muitaluvvo dan rájes go boazosámit gávdne veaikegeđggiid, gitta oanehis áiggi doibmii ja dassái go suohkanstivra 2013 bissehii ođđasit álggahanplánaid.
Vuosttaš
Eará ruvkket man birra girjjis muitaluvvo lea Fálesnuorri, Mátta-Várjjat, Sokndal ja Naustdal. Guhkes kapihttalis lea čilgejuvvon movt Mátta- Várjjaga ruvke lea leamaš ja movt šaddá, earenoamážit birasváttisvuođaid dáfus ja movt dat čuohcá servvodahkii. Dát girji lea vuosttas girji plánejuvvon golmma girjji ráiddus “Gull, gråstein og grums”.
Duorastaga lei girječálli Svein Lund Fálesnuoris muitaleame girjji birra, ja lávvordaga lea son Girkonjárggas.
