Porsáŋggu gielda dieđiha ahte vuosttaš olmmoš gielddas lea jápmán covid-19 dávdii.
Porsáŋggu gielda dieđiha preassadieđáhusas skábmamánu ovccát beaivvi ahte Porsáŋggus lea vuosttaš olmmoš jápmán covid-19 virus njoammudávdii.
– Sotnabeaivvi, skábmamánu gávccát beaivvi, jámii okta Porsáŋggu gieldda ássi covid-19 njoammudávdda geažil. Lea duođaštuvvon ahte covid-19 virusa lea sivalaš dan olbmo jápmimii. Dat olmmoš lei buohcci Porsáŋggu dearvvašvuođaguovddážis. Olbmosuodjaleami ja oapmahaččaid dihtii ii dieđihuvvo man boaris son lei, iige makkár sohkabeallái son gulai. Gielda lea dieđihan oapmahaččaide ja dihtet preassadieđáhusa birra, čállá Porsáŋggu gielda.
Sadjásaš sátnejođiheaddji Sylvi Josefine Johnsen váldá oasi sin morrašis ja sádde váimmolaš dearvvuođaid oapmahaččaide.
