Ávvira podcast «Mu eallin»:
Duorastaga cuoŋománu 23. beaivvi lei historjjálaš beaivi Ávviris go almmuhuvvui vuosttaš oassi podcast-ráiddus, mii lea ožžon nama «Mu eallin».
«Mu eallin» podcastas lea eallin fáddán ja mii humadit olbmuiguin sihke buriid ja heajos vásáhusaid birra mat leat rievdadan eallima.
Ánne Biret Anti lea Ávvira prošeaktabargi ja lea ge son gii jođiha podcasta. Son lea bargan mediamáilmmis gaskkohagaid fargga 30 jagi, muhto podcast gal lei amas sutnje go álggii.
– Mun lean bargan NRK Sámis sihke rádio- ja TV-journalistan, nu ahte áibbas amas dat ii lean. Podcast lea veaháš earálágan go golmma minuhtasaš ođasášši, go olmmoš ferte smiehttat veaháš earáládje go galgá muitalit olles historjjá. Lea gal hui váivi čuohppat ja oanidit buriid jearahallamiid ja historjjáid, čilge Anti.
Vuosttaš lossa muitalus
Vuosttaš oassi almmuhuvvui ge duorastaga, ja das lei Joar Eira Rasdal, gii muitalii iežas eallima birra ja mo iešguđetge dávddat leat váikkuhan ja rievdadan su eallima. Anti ii lean goassege deaivvadan Joariin ovdal go vulggii su lusa báddet vuosttaš oasi, nu ahte son lei gealdagasas go diđii ahte lea garra muitalus go lei ráhkkanan bures.
– Mun ledjen ságastallan su oapmahaččain ollu ovdagihtii ja munnos lei gulahallan nu ahte dovden ja dihten ollu Joara eallimis ovdagihtii. In lean deaivvadan suinna ovdal go bohten Guovdageainnu dearvvašvuođaguovddážii. Mus lei nu hállu muitalit Joara muitalusa go dat lea nu earenoamáš. Joar lea hui rabas olmmoš ja son muitalii eallima historjjá, ja dat gal njuorasmahtii mu. Oba máŋgii jearahaladettiin šadden sihkkut gatnjaliid, muitala Anti vuosttaš oasi birra ja háliida dan seammás giitit buohkaid geat áigot searvat ja eandalii giitá Joara go searvvai muitalit iežas eallima birra.
Anti lea dál bargame nuppiin osiin «Mu eallin» podcast-ráiddus ja nubbi oassi ilbmá boahtte vahkku mielde. Son sáhttá muitalit ahte nubbi oassi lea nanu, čaffadis ja garra nissonolbmo birra gii nuorra agis bázii leaskan njeljiin mánáin.
Eai dušše lossa muitalusat
Ulbmil podcastain lea muitalit vásáhusaid ja dáhpáhusaid mat leat rievdadan olbmo eallima. Eai dárbbaš dušše váivves dahje surgadis dáhpáhusat ja vásáhusat mat bohtet ovdan, muhto dáhpáhusat mat leat rievdadan olbmo eallima.
– Ulbmil lea deaivvadit olbmuiguin geain leat iešguđetge dáhpáhusat. Jus lea ollašuhttán hirbmat stuora niegu ja birge bures dainna nieguin. Sáhttá muhtin gii lea vuoitán ollu ruđa dahje ožžon hirbmat buori barggu. Dat leat maid dakkár áššit mat rievdadit ja jorgalit olbmo eallima. Daid lea maid hui somá gullat, čilge Anti, gii álggii bargui ođđajagemánu loahpas.
Eambbo ođđa áššit
Ávvira váldodoaimmaheaddji Kari Lisbeth Hermansen lea duhtavaš vuosttaš osiin «Mu eallin» ráiddus, ja muitala ahte podcast lea oassi Ávvira digitála fálaldagain strategiijaplánas.
– Mii bargat dássedit ovdánahttit iežamet fálaldagaid ja eandalii digitála fálaldagaid iežamet strategiijaplána mielde. Ávvir podcast ja nu gohčoduvvon «longreads-áššit» leat mihtut maid mii leat muhtun áiggiid bargan olahit. Ođđajagemánu virgáideimmet bargi gii bargá sisdoalloovdánahttimiin ja min strategiijaplána mihtuid vuostá. Dat lea leamašan hui ávkkálaš ja mii leat ge hui ilus go dál leat gergosat almmuhit Ávvir podcast, lohká Ávvira váldodoaimmaheaddji Kari Lisbeth Hermansen.
Podcasta ii leat áidna ođas mainna Ávvir dál álgá, sáhttá Hermansen almmostahttit.
– Seammás go podcast almmuhit, de álgit mii maid vahkkosaččat fállat guhkebuš áššiid sihke neahtas ja báhpiris. Muhtun áššiid vuođđun lea min podcasta, muhto mii áigut maid fállat eará guhkes lohkamušaid. Dáin guhkebuš čállosiin lea mihtun muitalit earenoamáš historjjáid, oahpásmuvvat olbmuiguin ja sin eallinvurbbiiguin ja maid geahčestit maŋos unnit ja stuorát dáhpáhusaide sámi historjjás ja servvodagas. Dieđusge lea maid mihttun hábmet daid nu ahte lohkki oažžu buori lohkanvásáhusa, čilge váldodoaimmaheaddji.
– Mannan njuovžilit
Ávvira doaibmaossodaga jođiheaddji Per Christian Biti lohká teknihkalaš oasi barggus mannan njuovžilit ii ge loga nu stuora hástalusaid leamaš.
– Gáibida dieđusge áiggi gávdnat buriid čovdosiid. Oassi barggus lea leamaš gávdnat vuogas podcast báikki, dadjá Biti ja lohká sullii vahkku bargan teknihkalaš osiin.
Biti háliida maid rámidit mielbargiid geat leat bargan podcastain ja muitala ahte buot návccat mat leat adnon leat gávdnon siskkáldasat Ávviris.
– Anne Gro Gaup lea ráhkadan šuoŋa ja bargan grafihkain nu ahte son ánssáša dan rámi. Muđui leat mis leamaš buot návccat Ávviris, dadjá son.
