Ubmi universitehta bidjá čavčča rájes johtui oahppofálaldaga man ovdal eai leat fállan Ruoŧas, namalassii sámi- ja eamiálbmotdearvvasvuohta.
– Lea stuora dárbu gelbbolašvuhtii sámi- ja eamiálbmotdearvvašvuođa birra servodagas, ja earenoamážit sámi hálddašanguovlluin. Ubmi universitehta ásahuvvui dan váste ahte oažžut eambbo dearvvašvuođabargiid Davvi-Ruŧŧii. Danne lea ge dál áigi ahte mii measta 60 jagi maŋŋel álggahit oahpu sámi dearvvašvuođa birra, dadjá Ubmi universitehta dutki Jon Petter Stoor preassadieđáhusas. Son lei ge gii vuolggahii jurdaga álggahit dakkár oahpu,
Ođđa oahppofálaldagas ožžot studeanttat viiddis láidesteami sámi- ja eamiálbmotdearvvašvuođa fágasuorgái. Kurssas deattuhuvvo dilli Sámis ja maid eamiálbmotdearvvašvuohta viidábut. Oahppu lea oaivvilduvvon sidjiide geat beroštit sámi- ja eamiálbmotdearvvašvuođas ja eandalii sidjiide geat bargat dearvvašvuođasuorggis.
