-Almmuhus-
-Almmuhus-
OĐĐASATVuosttaš masterstudeanttat vuođđoskuvlaoahpaheaddjeoahpus Álttás geargan

Vuosttaš masterstudeanttat vuođđoskuvlaoahpaheaddjeoahpus Álttás geargan

-

-

Ođđa masteroahpu oahpaheaddjit leat bivnnuhat, ja máŋggas sis bisánit Finnmárkui.

Masterstudeanttat gáiddus vuođđoskuvlaoahpahusas oahpaheaddjeoahpu ja pedagogihka instituhtas Álttás, gerge viđa jagi oahpuin ja ávvudedje dan miessemánu 21. beaivvi, dieđiha Norgga árktalaš universitehta sin neahttasiiddus.

 

Bargofálaldagat

Dat 16 studeantta leat vuosttažat geat gerge oahpus UiT:s Álttás, ja geat leat gergosat čavget bargomárkanii, gos dego čurvot gelbbolašvuođadárbbu. Oahpaheaddjeváili lassána Norggas, ja earenoamážit Finnmárkkus.

– Mii diehtit ahte máŋggas leat ožžon bargofálaldaga, earret eará Álttás maid. Lea stuora dárbu oahppan oahpaheddjiide, eat ge nagot buvttadit doarvái oahpaheddjiid, lohká Yngve Engkvist, gii lea  Álttás campusa oahpaheaddji ja pedagogihka instituhta jođiheaddji.

Masterstudeanttaide dárbu dagaha maid ahte olu suohkanat fállet earenoamáš buriid bargoeavttuid aiddooahppan oahpaheddjiide, ja maiddái stipeandda ja alla bálkká.

 

Neahta bokte čuvvon oahpahusa

Sii geat dál gerge oahpus Álttás leat maid vuosttažat geat leat čuvvon oahpahusa neahta bokte, ja leat sáhttán čuovvut oahpahusa Girkonjárggas.

– Mis leat maid eanet báikkit gos sáhttá čuovvut oahpahusa Finnmárkkus. Ovdamearkka dihte báikkit gos sáhttá čuovvut oahpahusa lea Hámmárfeasttas. Maŋemus joavku sáhtii čuovvut oahpahusa Girkonjárggas ja Ráissas, dasa lassin Álttás vel, lohká Engkvist.

 

-Almmuhus-