-Almmuhus-
-Almmuhus-
MÁNÁT JA NUORAT Vuosttas mánáid-tv ubmi­sámegillii: – Áigi vuoruhit giela

Vuosttas mánáid-tv ubmi­sámegillii: – Áigi vuoruhit giela

-

-

Lea vuosttas gearddi go lea buvttaduvvon mánáid-tv ubmisámegillii. 

Lea SVT Sápmi mii dál almmuha guoktenuppelohkái oasi ođđa tv-ráiddus ubmisámegillii. «Riebien Svarggaldahkka» mánáid-tv prográmma lea riebana birra mii ráhkada álkes borramuša maid mánát ieža sáhttet maid ráhkadit ruovttus. Rieban de guossuha borramuša iežas olbmáide, bohccui, sarvái ja guvžii, muitala SVT Sámi buvttadeaddji Jenny Skoglund. 

– Rieban son ii oainne nu bures ja stunže gievkkanis nu ahte šaddá oalle suohtas prográmma, čilge Skoglund.

Skoglund muitala ahte lea vuosttas gearddi go buvttaduvvo tv-prográmma ubmisámegillii.

– Erenomáš dan prográmmas lea ahte lea ubmisámegillii. Ubmisámegillii ii gávdno báljo ii mihkkege buvttaduvvon ja ubmisámegiella ii gullo báljo ollunge mediafálaldagain odne nu mot TV ja rádios. Nu ahte lea deaŧalaš prográmma nu ládje, čilge son. 

Stuora dárbu

SVT Sámi buvttadeaddji Jenny Skoglund čilge ahte lea stuora dárbu prográmmii ja ahte min sámegielat leat seamma deaŧalaččat. Su mielas lea áigi ahte unnit sámegielat maid vuoruhuvvojit.

– Leat mánát geat dál viimmat besset oaidnit tv-prográmma iežaset gillii. Geahččit leat váldán oktavuođa muinna ja muitalan ahte lea hui buorre go leat buvttadan dan ráiddu. Gullen ahte váhnen, Sohpia Renfjell, lei nu ilus go viimmat gávdno dál ubmisámegillii mánáid-tv fálaldat.   

PROGRÁMMA BUVTTADEADDJI: SVT Sámi buvttadeaddji Jenny Skoglund čilge ahte lei somá buvttadit dan tv-prográmma ja lea earenomáš go lea ubmisámegillii. Govva: Ávvir arkiiva, Astrid Helander.
PROGRÁMMA BUVTTADEADDJI: SVT Sámi buvttadeaddji Jenny Skoglund čilge ahte lei somá buvttadit dan tv-prográmma ja lea earenomáš go lea ubmisámegillii. Govva: Ávvir arkiiva, Astrid Helander.

Heivet buohkaide

Skoglund čilge ahte ulbmil mánáid-tv prográmmain lea ahte galgá heivet sihke mánáide geat leat oahppame giela, muhto maid ollesolbmuide. 

– Lean čájehan prográmma ubmisámegielat mánáide ja sii čohkkádedje nu jaska ja čuvvo mielde ja reške. De lei mus buorre dovdu. 

Eatnigiella

SVT Sámi buvttadeaddji Jenny Skoglund čilge ahte lei somá buvttadit dan tv-prográmma.

–  Lei earenomáš somá go bessen vuoruhit ubmisámegiela mii lea duođas mu eatnigiella maiddái. Mun lean ieš dan guovllus eret ja galggalin ubmisámegiela hupmat. Nu dat lei somá ja sávan mii beassat buvttadit eanet rieban prográmmaid. Mánát leat oahpástuvvan Riebanii, ja lea somá su čuovvut go huobmá iešguđet áššiid bargat. 

– Maŋŋá dan lean buvttadeami mánáid-tv nuorabut mánáide davvisámegillii mas mii fas deaivvadit riebaniin, muitala SVT Sámi buvttadeaddji Jenny Skoglund. 

SVT dubbe maid seamma ráiddu máttasámegillii «Riepien svarkeldahke». Prográmma oasit gávdnojit SVT Playas ja sáddejuvvojit maid SVT:s. 

-Almmuhus-