Dál álget skuvllat, ja leat olu ođđa skuvlamánát jođus luoddaguora. Vuosttaš luohká mánáid vuosttaš deaivvadeapmi johtolagain sáhttá leat issoras, muhto biilavuoddjit sáhttet dahkat ođđa dili oadjebassan. Trygg Trafikkas lea ávžžuhus buohkaide – leage áicil ja áinnas guođe biilla jus sáhtát.
Olu doaibmabijut leat mielde váikkuheamen mo mánáid skuvlamátki šaddá. Skuvllat oahpahit mánáide johtolatsihkarvuođa, váhnemat hárjehallet mánáiguin ja biilavuoddji lea áicil ja várrogas. Dan lohká Kenneth Minde, Trygg Trafikk gaskaboddosaš oahpahusgoavda, preassadieđáhusas.
Vuođđoskuvlla mánáin, erenomážit vuosttašluohkkáhasain, ii leat olu johtolathárjáneapmi. Dál, go sii leat fas oidnosis johtolagas, de ávžžuhuvvojit biilavuoddjit áicat eambbo ja vuodjit várrogasat.
Guođe biilla jus sáhtát
Olu skuvllain lea dat seamma váttisvuohta, ahte lea olu johtolat skuvlla guovllus. Dát sáhttá dagahit váralaš dilálašvuođaid. Vaikke vel leage nu ahte bearrašiin lea dárbu biillain johtit juohke beaivvi, de ávžžuha Minde váhnemiid movttiidahttit mánáid baicce vázzit dahje sihkkelastit skuvlii.
– Lea rávisolbmo ovddasvástádus ahte mánáin, iige dušše min iežamet mánáin, lea oadjebas skuvlamátki. Gárži ja eahpevárddus dilálašvuođat lea riskabealli skuvlašiljus, juohke beaivvi. Nu ahte jus šattat vuodjit biillain, de lea buoret bisánit veaháš duobbelis, ja baicce vázzit, muitala Minde.
Háliidit eambbo «Váibmosonaid»
Trygg Trafikk ávžžuha skuvllaid ásahit «Váibmosonaid», dahje «Hjertesoner» iežaset skuvlašilljui.
– Šaddet eambbo ja eambbo «Váibmosonat» Norggas, mii lea hui buorre. Mii oaidnit ahte dat lea buoremus doaibmabidju mii lea, go lea sáhka oadjebas skuvlamátkkis, deattuha Minde preassadieđáhusas.
«Váibmosona», dahje «Hjertesone», lea oassin skuvlašiljus gokko galgá unnán biilajohtolat. Mánát geat čuvvot biillaid njuikejit eret guođđinbáikkis olggobealde skuvlla, ja Váibmosonas ges lea olmmoš gii čuovvu mánáid skuvlašilljui.
