Mannan vahkkoloahpa duođaštuvvui vuosttaš koronanjoammun Gáivuonas. Dál leamaš koronanjoammun buot Romssa suohkaniin.
Lávvardaga duođaštuvvui positiiva koronaiskus Gáivuonas, čállá suohkana váldodoavttir preassadieđáhusas.
– Positiiva koronaiskkus gullá muhtin guosseássái geas leamaš koronavirus maŋimuš golbma mánu. Sus eai leat dál makkár ge dávdamearkkat ja eat bala ahte sus lea dát dávda. Go olbmos leamaš koronavirus, de sáhttá koronaiskkus leat positiiva golbma mánu maŋŋel buohcanáigodaga. Mii eat bala ahte dát olmmoš njoammuda koronavirusa. Mii leat čađahan varraiskosa duođaštan dihte dán. Gáivuona suohkanis ii leat dárbu ásahit báikkálaš njoammuneastadandoaimmaid, dieđiha váldodoavttir Anita Monsen Pedersen preassadieđáhusas.
Gáivuonas ii leamaš dássážii okta ge koronanjoammun, muhto go dál lea doppe duođaštuvvon positiiva koronaiskkus, de dat mielddisbuktá ahte buot Romssa suohkaniin leamaš koronavirus.
