Deanu joatkkaskuvllas ledje maid otne beaivedoalut. Koahkkaoahpahalli Filip Saua málestii biđđosa vuosttáš háve.
– Manai bures, vaikko lei vuosttáš geardde go málestin biđđosa. Mus lei veahkki ja lei hui somá oahppat ođđa borramušaid ráhkadit, lohká Deanu joatkkaskuvlla koahkkaoahpahalli Filip Saua.
Coggalii gávtti
Filip Saua mielas lea dehálaš čalmmustahttit sápmelaččaid ja lohká buorre go lea okta beaivvi goas beassá iežas ávvudit.
Son nuolastii koahkkabiktasiid ja coggalii Várjjat gávtti ala go gearggai kievkkanbargguiguin.
Jahkásaččat ávvudit
Deanu joatkkaskuvlla rektor Eva Britt Birkenes lohká ahte sidjiide lea lunddolaš ávvudit Sámi álbmotbeaivvi.
– Lea beaivi maid mii galgat ávvudit jahkásaččat. Hui somá oaidnit ahte oahppit ja oahpaheaddjit ovttasbarget nu ahte mis šaddet fiinna doalut, lohká rektor.
Ávvudan golbma jagi
Beanavuodjinsuorggi oahppiguovttos Helena ja Mia leaba golbma jagi ávvudan Sámi álbmotbeaivvi.
Soai lohkaba lea hui somá beassat searvat ávvudoaluide.
– Lea hui somá njoarostit. Lea hui somás beaivi goas beassat searvat iešguđetlágán doaimmaide, ja borrat njálgga mállásiid, lohka Mia.
