Bovdejit juigiid lávdái čoaggit ruđa nissonolbmuide geafimus riikkain máilmmis.
Guovdageainnus áigut lágidit juoiganeahkeda bearjadaga, čoaggindihte ruđaid dán jagáš TV-akšuvdnii. De bovdejit dovddus juigiid ja earáid geat háliidit lávdái.
– Mii sávvat ahte bohtet nu ollu olbmot go vejolaš, dadjá akšuvnna-lávdegotti jođiheaddji Susanne Elisabeth Siri gii dadjá ahte lea vuosttaš geardde go juoigamiin áigut čoaggit ruđa Guovdageainnus.
Juoigit miehta Sámi
Sii vuvdet bileahtaid lágideapmái, ja sisaboađus manná TV-akšuvdnii. Siri muitala ahte sii sávvet oaččot juigiid Mázes ja Kárášjogas, ja áinnas eará sámi guovlluin.
– Mii doallat čiegusin geaid galget juoigat, vai šaddá eambbo gelddolaš olbmuide oaidnit geat dat leat, hástala Siri olbmuid lágidemiide. Son lohká ahte sis leat stuora vuordámušat bearjadahkii.
– Mis leat stuora vuordámušat go mii diehtit ahte olbmot beroštit luđiin ja ahte mii beroštit nubbi nuppis, dadjá Siri gii ávžžuha olbmuid searvat sihke juoiganeahkedii ja sotnabeaivve ruhtačoaggimii.
– Ávžžuhus lea dieđusge ahte olbmot servet ja ahte mii fárrolaga sáhttit loktet servodaga doarjut dehálaš ášši. Váldde áinnas oktavuođa jus áiggut searvat, bivdá Susanne Elisabeth Siri.
Juohke jagi
Sotnabeaivve lea TV-akšuvdna mii lágiduvvot jahkásaččat ja mas ođđa vuosttáváldin-searvi juohke jagi. Dán jagáš akšuvdna čoaggá ruđa CARE-nammásaš idealisttalaš-searvái, ja sin ulbmiljoavku lea nissonolbmot máilmmi geafimus riikkain. CARE-searvvi mihttu lea veahkehit 400 000 nissonolbmo investeret iežaset bargosaji. Dutkan čájeha ahte dat sáhttá buktit buriid váikkuhusaid olles bearrašii go nissonolbmot ožžot dietnasa. Áigumuš lea maid oahpahit nissonolbmuid hearkkes dilis politihkalaš doaimmaide ja seksuálalaš dearvvašvuođa birra, ja maiddái eadnedearvvašvuođa birra.
