Badjelaš 50-jahkásaš nissonis, gii ássá Mátta-Várjjaga gielddas, lea duođaštuvvon koronavirus ja lea buohccán dáinna dávddain.
Mátta-Várjjaga njoammunsuddjendoavttir Drude Bratlien dieđiha ahte sii ožžo iskkusdieđu duorastateahkeda UNN mikrobiologas Romssas. Nissonolmmoš oaččui dieđu dan birra telefovnna bokte njukčamánu 26. beaivvi njoammunsuddjendoaktáris. Gielddadoavttir ja Álbmotdearvvašvuođainstituhtta leat maid ožžon dieđu, dieđiha gielda dieđáhusas.
Isolerejuvvon
Nisu lea isolerejuvvon iežas ruktoi bearrašiin ja dilálašvuođa ektui de manná suinna bures. Son návdo njoammuduvvon olgoriikkas luomus ja sus leat dávdamearkkat, mii lei sivvan manne son beasai váldit iskosa, dieđiha Mátta-Várjjaga gielda.
Álggahan njoammunguorrama
Mátta-Várjjaga gielda lea ráhkkanan bures dán dillái ja lea bidjan johtui doaibmabijuid Álbmotdearvvašvuođainstituhta njuolggadusaid vuođul. Njoammunsuddjendoavttir lea álgán kártet ja guorrat njoammungeainnu, ja oažžu veahki FHI:s ja báikkálaš ja regiovnnalaš njoammunsuddjenresurssain.
– Váldo oktavuohta singuin geat sáhttet leat eksponerejuvvon, dás lea sáhka moatti olbmos. Nisu ja su bearaš leat čuvvon errenáigenjuolggadusaid ja leat leamaš errenáiggis maŋŋel go leat leamaš olgoriikkas ja sis lea leamaš hui unnán oktavuohta eará olbmuiguin dávdaáigodagas.
Dovdo dego šohkkan
Sii geat leat leamaš lagašoktavuođas nissoniin ožžot persovnnalaš njoammunsuddjenneavvuma ja fertejit leat errenáiggis. Dearvvašvuođabálvalus čuovvola sin.
– Seammás go gielda lea bures ráhkkanan, de áddet mii ahte dat dovdo dego šohkkan dasa gii lea buohccán, lagaš bearrašii ja skihpáriidda. Gieldda ássit galget diehtit ahte mii bargat buot maid sáhttit addit buoremus doarjaga ja čuovvoleami bearrašii, dadjá njoammunsuddjendoavttir Drude Bratlien.
Mátta-Várjjat gielddas lea njuolgasátta sin Facebook siidu bokte dii11.00.
