Porsáŋggu gielda lea váldán vuostá dorvoohcciid Skuvvanvári turistaguovddážii.
Porsáŋggu gielda lea váldán vuostá dorvoohcciid Skuvvanvári turistaguovddážii.
Mánnodaga bohte vuosttaš 40 dorvoohcci Porsáŋgui. Sii galget orrut Skuvvanvári turistaguovddážis, ja lea Davvi-Norgga Vuostáiváldinguovddáš mas lea ovddasvástádus ja lea láigoheaddji. Turistaguovddáš galgá leat gaskaboddosaš orrunbáikin, muhto ii leat sihkar man guhká doaimmahit dan gaskaboddosažžan.
Eanaš nuorra dievddut
Duorastahkii vurdet vel 40 ođđa dorvoohcci boahtit Skuvvanvárrái ja dalle leat orrunsajit dievvan. Olbmot geat ohcet dorvvu leat eanaš nuorra dievddut, muhto maiddái muhtin bearašjoavkkut. Sii leat vuolgán Syrias, Afghanistanas, Egyptas ja Irakas.
Ásahit eanet guovddážiid
Lea maid plána ásahit vuostáiváldinguovddážiid Bissojohkii ja Levdnjii, muhto gielddas eai leat vel eanet dieđut dan birra.
