-Almmuhus-
VALÁŠTALLAN– Vuostebiekkain dat oahppá eanemus

– Vuostebiekkain dat oahppá eanemus

-

-

Lotnolasgilvaleaddjis Håvard Klemetsenas lea leamaš lossa áigi go ii beassan mielde máilmmimeasttirgilvvuide, ja muđui leat karrieras leamaš ollu vuostebiekkat. Dál áigu geahččalit bures loahpahit dán áigodaga mii vel lea.

Lotnolasgilvaleaddji Håvard Klemetsen lea dál Lillehammeris, ráhkkaneame boahtte World Cup gilvvuide, mat leat Holmenkollenis lávvordaga ja boahtte vahkkus fas Troandimis.

 

Lossa áigi leamaš

Klemetsenas lea leamaš veaháš lossa áigi, maŋŋel go ii meinestuvvon beassat mielde dán dálvvi váldomihttui, namalassii máilmmimeasttirgilvvuide Lahtis, Suomas.

Leat smávva margiinnat váldovaláštallamis, ja go in leat olahan buoret bohtosiid ovdal guovvamánu dán áigodagas, de lei govttolaš ahte ledjen ruovttus máilmmimeasttirgilvvuid oktavuođas. Lean leamaš ruovttus ja geahččalan gávdnat «iežan», nu ahte loahppaáigodat šaddá munnje eanet positiivan. Dál geahčan ovddasguvlui ja illudan gilvalit ruovttušiljus, ja oaidnit lean go dál «buorránan», vai beasan leahkit fas váikkuheame World Cupas nu movt dieđán mun sáhtán, muitala Klemetsen e-poasttas Ávvirii.

 

Garra hárjehallanáigodat

Klemetsen dovdá son lea ovdánan positiivalaččat ja lea beassan čađahit buori hárjehallanáigodaga maŋemus vahkkuid, maŋŋel go bođii ruoktot World Cup gilvvuin Ásias.

– Dovddan iežan veahá váiban hárjehallamiin, ja lean aiddo loahpahan garra hárjehallanáigodaga go lean oassálastán Norgga Cupas Lillehammeris mannan vahkkoloahpa. Ožžon guokte nuppi saji gilvvuin, ja dahken iežan mielas bures dan ektui go lean váiban ja movt rumaš dovdo dál, lohká son. Čuovvovaš beivviid áigu son gulul váldit hárjehallamiin, nu ahte sávvamis buktá dat veaháš návccaid ja positiiva bohtosiid.

 

– Manná vulos bajás

Klemetsen lohká mannat vulos ja bajás eallimis, ja muhtumin sáhttá lea lossat birgehallat beahttašumiin go dovdá ahte eai boađe bohtosat vaikko man garrasit bargá.

– Dat lea oassin váldovaláštallama eallimis, lohká son.

 

Vuostebiekkat

Son muitala veaháš bártidan buozalmasvuođain dán dálvvi, mii lea čuohcan forbmii.

– Mii leat hui hearkkit, ja buot vuolgá das movt birge dehálaš gilvvuin.

Son muitala sus leat leamaš ollu vuostebiekkat iežas karriearas, ja lea álo beassan dain buriin vuimmiin. 

– Mu vásáhus lea ahte lean oahppan eanemusat go lea veaháš vuostebiegga. Vaikko movt jorahallá ášši, de lea nu ahte lea loahpa loahpas dušše okta diŋga mii ávkkuha jus galgá váldovaláštallamis leahkit njunnošis: olmmoš ferte duođas háliidit dan ja bátnegáskki bargat dan ala, lohká Klemetsen.

 

-Almmuhus-