Artista Agnete Johnsen oaččui 2016 Rabasvuođabálkkašumi dan ovddas go almmolaččat lea muitalan iežas psykalaš váttuid birra. Son ii nagodan ieš boahtit vuostáiváldit bálkkašumi.
Artista Agnete Johnsen oaččui 2016 Rabasvuođabálkkašumi dan ovddas go almmolaččat lea muitalan iežas psykalaš váttuid birra. Son ii nagodan ieš boahtit vuostáiváldit bálkkašumi.
– Mun duođaid háliidivččen leat dáppe vuostáiváldit bálkkašumi, muhto ferten fuolahit iežan, čállá Agnete Johnsen iežas giitinreivves dan oktavuođas go sutnje geigejuvvui bálkkašupmi.
Manager vuostáiválddii
Su manager Espen Nystad bođii TV2:ii ja Nationaltheaterii vuostáiváldit bálkkašumi, ja logai Johnsena giitinreivve.
Rabasvuođabálkkašupmi lea Mental Helse jahkásaš bálkkašupmi olbmuide geat erenoamážit leat veahkehan dahkat eanet rabasvuođa psykalaš dearvvašvuođa birra.
Dat juhkkojuvvo Máilmmi psykalaš dearvvašvuođa beaivvi, golggotmánu 10. beaivvi.
«Eai lean stivremis»
Reivvestis čállá artista, guhte Eurovision gilvvuin Stockholmas mannan giđa ovddastii Norgga, ahte ovdal dáid lávlungilvvuid ražai son nu sákka mentálalaččat ahte fertii geassádit eret.
– Jurdagat eai lean stivremis ja mun fertejin geassádit buot eará diŋggain earret go musihkas, ja fertejin dáhttut mu birrasa leat áibbas jaskadin. Lei lossat, muhto dárbbašlaš válljejupmi. Nu lea mus odne maid, čállá son.
Geassádii reality-ráiddus
Vaikke ii leat go 22-jahkásaš de lea Johnsen jo jahkeviissaid beaggán norgga almmolašvuođas.
Nuorran lei son mielde The BlackSheeps joavkkus mii 2008:s vuittii sihke norgga ja davvi-riikkalaš Melodi Grand Prix jr. finála.
Diibmá go geassádii TVNorge «71 grader nord» prográmmas, de rahpasit muitalii ahte lea guhkit áigge rahčan lossa jurdagiiguin ja psykalaš váttuiguin.
(©NTB)
