Odne álgá diggi guovtti boazodoalli vuostá geat leaba áššáskuhtton elliid illasteami ja roavva verrošeami dihte.
Odne álgá diggi guovtti boazodoalli vuostá geat leaba áššáskuhtton elliid illasteami ja roavva verrošeami dihte.
Juste ovdalaš jahkemolsašumi diibmá čielggai ahte guokte boazodoalli Finnmárkkus eret, leaba áššáskuhtton go galgaba illastan elliid ja verrošan stáda vuostá. Ášši lea dutkon máŋga jagi, ja odne álgá diggi Sis-Finnmárkku Diggegottis, dieđiha NRK Sápmi.
Dievdduin leat guokte bealušteaddji goappásge.
Elliid illastan
Boazopolitiijat leat dutkan boazoeaiggátguoktá ja várohit soai leaba reaidduin hávvádan oktiibuot 25 bohcco nu ahte orrot boraspirevahágat, ja sádden ráppiid Fylkkamánnii oažžun dihte buhtadusa boasttu vuođu alde.
Elliid biinnideapmi galgá dáhpáhuvvan 2010:s 2014:i rádjái. Boazopolitiijat leat dutkan ášši, muhto lea Økokrim mii lea áššáskuhttán dievdduid. Lea jáhkkimis vuosttaš geardde go Økokrim lea seaguhan iežas áššái mii lea boazodoalloealáhussii gullevaš, čállá NRK Sápmi.
Máksit birrasiid 1,7 miljovnna ruovttoluotta
Økokrim lea bidjan čuoččuhusa ahte boazoeaiggádat galgaba máksit buhtadusa stáhtii, Birasdirektoráhttii, badjel 800 000 ruvnno goabbáge. Áktor lea bidjan gáibádusa elliidsuodjalanlága paragráfa 33 vuođul, mas daddjo guhte ii doahttal dán lága dahje roavvat rihkku dan, sáhttá massit rievtti bargat elliiguin ovtta vissis áigái dahje vaikko agibeaivái.
