-Almmuhus-
OĐĐASATVuoruhit árbedieđu Deanus

Vuoruhit árbedieđu Deanus

-

-

Deanu joatkaskuvla lea ohcan ruđaid Sámedikkis «Árbediehtu» -prošektii, mas ulbmilin lea ovddidit ja seailluhit sámi árbevieruid. Dál leat ožžon stuora supmásaš doarjaga.

– Prošeavtta ulbmil lea gaskkustit sámi meahcásteami kulturárbbi joatkkaskuvlla bokte ja sii áigot áŋgiruššat oažžut sámi árbedieđu eanandoalus oahppoplánaide. Dat čájeha hirbmat mávssolaš áigumušaid sis dáinna prošeavttain, dadjaba Sámedikki ráđđelahtut Mikkel Eskil Mikkelsen ja Berit Marie P. E. Eira preassadieđáhusas.

 

Loktet sámi eanandoallo- ja mehcástanárbevieruid

339 000 ruvdnosaš doarjja, mii addo Regionálaovddidanprošeavttaid doarjaga bokte, galgá leat ávkin prošektii, mii lea juo bures jođus.

– Jáhkán prošeavttas leat olu ávkki. Jáhkán dat boahtá olu čalmmustahttit nuorra servodahkii min árbevieruid ja man dehálaš lea daid fievrredit viidáset. Jáhkán maid oallugiin lea hállu oahppat, muhto ii soaitte leamaš vejolašvuohta ovdal, lohká Berit Marie P. Eira Ávvirii.

– Lea dehálaš prošeakta, go lea mielde fievrredeame árbevirolaš máhtu viidáset. Das leat hirbmat olu iešguđetlágan doaimmat, buot guolásteamis boazodollui, lasiha Eira. 

 


– DEHÁLAŠ PROŠEAKTA: Sámedikki ráđđelahtu Berit Marie P. Eira mielas lea «Árbediehtu» -prošeakta dehálaš prošeakta. Govven: Åse Pulk/Sámediggi

Árbevirolaš barggut mat leat jávkamin nuorra sevodagas

Seammás go prošeakta lokte sámi eanandoalu ja meahcástallama árbevieruid, de jáhkká Eira dan maiddái sajáidahttit árbevirolaš máhtu ja nanusmahttit sámi identitehta, giela ja kultuvrra mánáid ja nuoraid gaskkas.

– Jáhkán ahte prošeakta lea stuora ávkin – go árbevirolaš máhttu lea dakkár mii lea olu jávkamin, eai ge leat nu oallugat geat sáhttet oahpahit dán máhtu viidáset. Ii leat šat nu álki oažžut dán oahpu go eai leat nu oallugat geat máhttet ja astet oahpahit, lohká Sámedikki ráđđelahttu, Berit Marie P. Eira.

 

Báikkálaš ovttasbargu

Deanu joatkkaskuvla galgá olu ovttasbargat báikkálaš olbmuiguin geain lea gelbbolašvuohta árbevirolaš bargguide maid áigot čalmmustahttit.

Dát čájeha ahte prošeakta lea ruohtastuvvon Deanus, oaivvilda Eira. 

– Prošeakta boahtá leat ovttasbargu singuin geat ain máhttet daid iešguđetlágan bargguid, nu go ovdamearkka dihte nuohttut. Go galget nuohttut, de ovttasbarget dakkár olbmuin gii máhttá dan. Prošeakta lea hui olu čadnon báikkálaš olbmuide, go sis vižžet dan máhtu mii dárbbahuvvo, lohká Eira. 

-Almmuhus-