Kulturminsttar Trine Skei Grande lohká sii álggos vuoruhit Saemien Sijte ja Beaivváš teáhtera, ovdal go sáhttet vuoruhit eará sámi museaid.
Norgga kulturministtar Trine Skei Grande (Gb) galledii Bååsteste konferánssa, mii lei Álbmotmuseas Bygdøyas, Oslos mannan vahkku. Son deattuhii man dehálaš barggu musea bargit leat dahkan Bååstede oktavuođas ja maid dan ahte dávvirat dárbbašit boahtit dohko gos olbmot dihtet daid birra ja dihtet mo galget dutkat daid. Dađibahábut lea ášši nu ahte eai buot sámi museain leat magasiinnat ja čájáhuslanjat vuostái váldit dávviriid. Dasa lohká kulturministtar ahte sii leat álggahan barggu, muhto eai sáhte vuoruhit buot oktanaga.
– Vuosttažin boahtá Saemien Sijte ja Beaivváš Teáhter, easka maŋŋá sáhttit geahčadišgoahtit daid eará sámi museaid. Dat lea čielggas ahte lea heajos dilli musea magasiinnain, mii dagaha ahte ii leat vejolaš máhcahit sámi dávviriid. Mii fertet bargat dan guvlui ahte sámi museat sáhttet váldit vuostá dávviriid ja maiddái dan ahte sáhttet vuhtiiváldit daid dávviriid mat dál leat eará museavuorkkáin, lohká kulturministtar Trine Skei Grande.
Son namuhii maiddái konferánssas ahte museat ja politihkkárat fertejit bargat dan vuostá ahte oažžut ruovttoluotta sámi dávviriid mat leat eará Eurohpá museain
Ođasmahttit vuoi hukset ođđa
Kulturministtar Grande muitala ahte ráđđehus čuovvu Sámedikki vuoruhanlisttu ja Sámedikki vuoruheamit leat Saemien Sijte, Beaivváš teáhter ja Sámi Dáiddamusea. 2020 stáhtabušeahtas juolluda ge ráđđehus 29,8 miljovnna Saemien Sijtii. Sámediggeráđđi Henrik Olsen lei maid Bååstede konferánssas ja son lohká šaddat gierdevašbargun ruovttoluottafievrridit sámi dávviriid.
– Mii, Sámediggi, leat álggahan barggu ja addán barggu Statsbyggii geahčadit museavisttiid. Sii galget árvvoštallat leat go rievdadan vejolašvuođat visttiin, vuoi ferte go hukset ođđa visttiid. Dat lea okta álgu min bealis, dadjá Sámediggeráđđi Henrik Olsen.
Sámediggi veahkeheamen
Olsen muitala ahte muhtin museain čovdojuvvojit dát hástalusat, nugo Saemien Sijtes Snoasas ja Árrán Ájluovttas.
– Várdobáiki lea maid okta dain gos Sámediggi lea mielde ruhtadeamen. Sii luoikkahit ruđaid, vuoi sáhttet ođasmahttit magasiinnaid. Mii geahččalit ieža čoavdit daid smávit báikkiin, dadjá son.
Lossa bajideamit Finnmárkkus
– Dain lossa áššiin, nugo Finnmárkkus gos galget fievrredit eanaš dávviriid ruovttoluotta, ferte Kulturdepartemeanta leat mielde ruhtadeames. Mii eat ožžon gal makkárge lohpádusaid ministaris dan oktavuođas, muhto leat su jurdagiin, loahpaha Sámediggeráđđi Henrik Olsen.
