Dál lea giđđa ja russaáigi olu báikkiin riikkas. Trygg Trafikk vuorjašuvvá russaid johtolatsihkarvuođain ja bivdet johtolatministara dahkat juoidá ovdal eambbo duođalaš lihkohisvuođat dáhpáhuvvet.
Russabusset leat dávjá boarrásat ja heajos stánddas, ja doibmet dávjá diskotehkan juvllaid alde. Roasmmehuvvan- ja lihkohisvuođapotensiála lea stuoris, ja maiddái politiijat ja Stáda geaidnodoaimmahat vuorjašuvvet dáinna ovdánemiin.
– Olu busset leat várálaččat luottaid alde. Dát kultuvra lea šaddan dakkár go ii galggaše leat. Mii eat sáhte šat dušše čuožžut ja geahččat go máŋgalogi russa gárrenoaivvis dánsot boares bussiin alla leahtus, main ii leat sihkar leat. Mii udnot nuoraide ávvudeami go skuvllas gerget, muhto fertet váruhit ahte eat masse iežamet nuoraid russabusselihkohisvuođain, dadjá Trygg Trafikk ossodatjođiheaddji Tanja Loftsgarden, preassadieđáhusas.
Politiijat ja Stáda geaidnodoaimmahat dárkkistit leat go:
– Boasttuvuođat ja váillit goazaniin, dávggiin ja karosseriijain
– Biillas/busses beare oallugat mielde (dan ektui go lea lohpi)
– Lobihis ja várálaš monteren aggregáhtain čuovggaide ja jitnii
– Aggregáhtat biddjojuvvon lobihemet ja várálaččat čuovggaide ja jitnii
– Lobihis kruvnnat dáhkis
– Gokčojuvvon heahtegeainnut
– Vuoddjit geain ii leat vuodjinlohpi dahje dohkálaš ámmátvuodjingelbbolašvuohta
– Vuoddjit geat eai beroš sihkarvuođas vuojidettiin
– Fievrrut registrerejuvvon eará riikkain, go dat eai álo deavdde Norgga njuolggadusaid
Dárbu ovttastahtti áŋgiruššamii
Johtolatsihkarvuođahástalusat russabussiin leat olu ja kompleaksat. Ovddasvástádus relevánta njuolggadusvuđđui ja dárkkistandoibmii gullá máŋggaid eiseválddiide.
– Mii ávžžuhit johtolatministara, geas lea bajemus ovddasvástádus johtolatsihkarvuođas, gii galgá álggahit nannema ja ovttastahttit áŋgiruššama, buoridit sihkarvuođa ja beassat eret láhkarihkkumiin mat gullet daid fievrruid geavaheapmái, dadjá Loftsgarden.
