– Heajos áššemeannudeapmi Birasdirektoráhtas dagaha ahte reaidodivadat luossamearrabivddus biddjojit johtui vaikko gullevaš bealit eai leat beassan buktit cealkámuša, dadjá sámediggelahttu Ronny Wilhelmsen (Bb).
– Heajos áššemeannudeapmi Birasdirektoráhtas dagaha ahte reaidodivadat luossamearrabivddus biddjojit johtui vaikko gullevaš bealit eai leat beassan buktit cealkámuša, dadjá sámediggelahttu Ronny Wilhelmsen (Bb).
Luossamearrabivdiide sáhttá šaddat noađđin, ja leat jo šaddan gierdat ollu gáržžidemiid guolásteamis. Reaidodivat galgá máksot juohke áigodaga ja juohke reaiddu ovddas maid geavaha mearrabivddus, čállá Bargiidbellodaga sámediggejoavku preassadieđáhusas.
Ávžžuhit jorgalahttit
Sámediggejoavku (Bb) ávžžuha eiseválddiid jorgalahttit mearrádusa, dassážii go mearrádusas lea vuđolaš gieđahallan.
– Mun lean hui ilus, go muitaluvvui Sámedikki sárdnestuolus ahte Sámediggeráđđi lea gáibidan ráđđádallama departemeanttain dohkkehuvvon guollereaidodivada birra, dadjá Ronny Wilhelmsen.
Ollu divadat
Mearraluossabivdiid ekonomalaš dilli vearáska eanet, go bággehuvvojit máksit vel eanet divadiid iežaset ealáhusdoaimmas. Dasa lassin fertejit mearraluossabivdit Finnmárkkus máksit eananeaiggátdivada Finnmárkkuopmodahkii.
– Gosa šadde lohpádusat?
Bargiidbellodaga sámediggejoavkku mielas lea imaš go ráđđehus čađat bidjá ođđa divadiid.
– Gosa šadde lohpádusat ráđđehusas ja ovttasbargobeliin ahte eai galgga ođđa divadat biddjot? Ovddádusbellodat ráđđehusas lea šaddan divatbellodahkan, loahpaha Ronny Wilhelmsen.
