-Almmuhus-
OĐĐASAT– Vuorjašuhtti man ollugat oaivvildit ahte olbmot geain lea eará etnalaš duogáš...

– Vuorjašuhtti man ollugat oaivvildit ahte olbmot geain lea eará etnalaš duogáš eai sáhte šaddat «áibbas norgalažžan»

Journalista

-

-

Ođđa iskosis čájehuvvo ahte lea nanu doarjja dásseárvo ja antidiskriminerenpolitihkkii Norggas, muhto lea stuora erohus guottuin sin vuostá geat leat suddjejuvvon vealahanlága ektui.

Earret eará oaivvildit badjelaš 16 proseantta sis ahte son gii lea sevdnjesvarat, ii sáhte goassege šaddat áibbas norgalažžan.

 

Erohus Somalia ja Ruoŧa gaskkas

Bufdir lea Fafo bivdán čađahit iskosa mas čogget dieđuid guottuid birra mat gusket dásseárvui ja vealahemiide. Iskosis boahtá ovdan ahte álbmot lea oalle konservatiiva sin ipmárdusas gii sáhttá šaddat «áibbas norgalažžan». 

Ipmárdus gii sáhttá šaddat áibbas norgalažžan, lea iešguđetlágan guđe sisafárrejeaddjejoavkkus jearrá.

39 proseantta lohket ahte sisafárrejeaddji, gii lea Somalias eret, ii sáhte šaddat áibbas norgalažžan, muhto juohke viđat oaivvilda ahte ruoŧŧelaš ii sáhte goassege šaddat norgalažžan. 16 proseantta oaivvildit ahte son gii lea sevdnjesvarat ii sáhte goassege šaddat áibbas norgalažžan.

 

Bargu vuordimis

Iskosis geahčadit vuohččan makkár guottut leat joavkkuide geat gullet vealahansuoji vuollai lága bokte.

Álbmogis lea nanu doarjja ahte galgá leat almmolaš dásseárvopolitihkka Norggas.

– Lea vuosttaš iskkus mas geahčaduvvo movt vealahanákkat gusket oktii, ja mii leat hirpmahuvvan ja vuorjašuvvan bohtosiid dihte. Lea váivi oaidnit ahte oainnut čearddaide ja etnisitehtii bohtet ovdii gii dohkkehuvvo norgalažžan. Fátmmasteapmi ja dásseárvu lea guovddáš oassi Norgga almmolašvuođas, ja mis lea bargu vuordimis nu ahte buoridit álbmoga guottuid, lohká Bufdir direktevra Mari Trommald preassadieđáhusas.

Dušše čieža proseantta oaivvildit ahte stáhta ii berre geavahit resurssaid ovddidit dásseárvvu ja vuostálastit vealaheami sin ovddas geat suddjejuvvojit vealahanlága bokte.

 

Vuorjašuvvet

Seammás boahtá ovdan ahte lea stuora erohus guottuid ektui iešguđet joavkkuin geat leat vealahanlága bokte suddjejuvvon.

– Lea hui buorre go olbmot leat nu positiivvat vealahansuodjái Norggas ja almmolaš dásseárvopolitihkkii. Seammás leat vuorjašuvvan go leat nu ollugat geat leat selektiiva dásis geaidda dat láhka guoská. Buohkat Norggas galget vásihit suddjema vealaheami vuostá, ja dál go mis lea dat diehtu, de fertet aktiivvalaččat bargat vai rievdadit máhtu ja guottuid. Guottuid birra máhttu álbmogis lea dehálaš vai oažžut servvodaga gos buohkat sáhttet searvat seamma dásis. Dárkkisteapmi veahkeha eanet máhtu hehttehusaid birra mat gusket fátmmastahttimii ja oassálasttimii, lohká Trommald.

 

 

-Almmuhus-