Soai nu illudeaba konsertii ahte leaba ráhkadan vuordinfilmmažiid, ikte almmuheigga vuosttaš video.
Máret Eline Hætta (14) ja Sárá Gáren Ánne Nilut (15) liikoba ráhkadit filmmažiid ja almmuhit daid YouTube bokte. Go gulaiba ahte lávlunnásti Isac Elliot lea boahtimin Guovdageidnui de mearrideigga ráhkadit vuordin filmmažiid, ikte almmuheigga vuosttaš dakkára ja odne almmuheigga nuppi.
– Moai oinniime YouTubes ahte muhtin eará lei ráhkadan dákkáriid, ja de oaččuime inspirašuvnna das, muitala Máret Eline.
Vuittiiga diibmá
Soai leaba birrasiid jagi ráhkadan dákkár filmmažiid, diibmá leigga searvan «Topp» nuoraidbláđi gilvui, mas nuorat hástaluvvoje ráhkadit filmmažiid One Direction joavkku birra. Dán gilvvu soai vuittiiga ja oaččuiga ge nuvttá mátki Londonii One Direction konsertii.
– Go ráhkadeimme dien filmma de fuomášeimme ahte dát lei hui somá ja dan rájes ledje joatkán ráhkadit filmmažiid, čilge Máret Eline.
Ii leat Ellioteer
Dál leaba ge eará nástti nammii ráhkadan filmmažiid, muhto ii Máret Eline mieđit iežas jur aitto «Ellioteerin» gal.
– Mun láven gal guldalit Isac Elliota lávlagiid, dadjá son ja čaibmá.
Muhto liikká mieđiha Máret Eline ahte lea somá go násti lea boahtimin Guovdageidnui.
– Son lea oainnát hui dovddu ja liikká boahtá deike, ja de lea čeahppi lávlut ja čáppat, skužista son.
Filmmažiiguin oaidnit mo soai vuordiba skuvlla nohkat vai beassášluopmu álggášii nu ahte Isac Elliot boahtá Guovdageidnui.
GEAHČA FILMMAŽIID:
