Ii goasse ovdal leat reantu leamaš nu vuollin go dál.
Loatnakássa dieđiha preassadieđáhusas ahte čakčamánu 1. beaivvi rájes vuolidit reanttu mii čuovvu márkanreanttu. Ođđa reantu šaddá 1,539 proseanta.
– Ii goasse ovdal leat studieloanas leamaš reantu nu vuollin go čakčamánu 1. beaivvi rájes boahtá leat, dadjá hálddašeaddji direktevra, Nina Schanke Funnemark, preassadieđáhusas.
Otná reantu lea 2,159 proseanta, muhto maiddái dat lea njiedjan njukčamánu rájes mii dalle lei 2,599 proseanta.
Ovddit háve go reantu lei measta liikká vuollin, lei 2016:s, go reantu ovtta áigodaga lei 1,756 proseanta, čállá Loatnakássa preassadieđáhusas.
