Sámediggeráđi Henrik Olsen oassálastá «Sameblod» filmma vuosttaščájálmasas Toronto filbmafestiválas.
Sámediggeráđi Henrik Olsen oassálastá «Sameblod» filmma vuosttaščájálmasas Toronto filbmafestiválas.
Čakčamánnu 8. beaivve rájes 18. beaivve rádjai lágiduvvo Toronto internationála filbmafestivála, sámediggeráđi Henrik Olsen oassálastá «Sameblod» filmma vuosttaščájálmasas Toronto filbmafestiválas.
– Filbma lea stuorra historjjálaš olahus Sápmái, lohká Sámediggeráđi Henrik Olsen preassadieđáhusastis.
Olahus maid háliidit doarjjut
«Sameblod» vuosttaščájálmas dáhpáhuvvá árvofámolaš Toronto filbmafestiválas čakčamánu gaskamuttos.
– Sámediggeráđđi háliida vuosttaščájálmasa oassálastima bokte doarjut ja čalmmustahttit dán stuorra olahusa maid «Sameblod» filbma ovddasta Sápmái. Lea stuorra olahus, sihke dainna go lea vuosttas lullisámi filbma mii goassege lea dahkkon, ja maiddái dainna go fáddá gieđahallá osiid sámiid historjjás masa lea dehálaš oažžut ain eanet fuomášumi sihke našunála ja internašunála dásis, dadjá sámediggeráđi Henrik Olsen.
Ožžon buriid árvvoštallamiid
Lea Amanda Kernell, gii ieš maid lea sápmelaš, guhte lea regisseren «Sameblod» filmma. Filbma buktá ovdan mo našunálastáhtat historjjálaččat leat gieđahallan sámiid, ja čuvgeha earenomážit sámi mánáid internáhtaeallima ja eiseválddiid čeardabiologiijapolitihka fievrrideami 1900-logus.
– Filbma lea juo ožžon buriid árvvoštallamiid ovdagihtii earret eará dovddus Veriety filbmamagasiinnas ja lea erenomáš illudahtti go filbma lea beassan árvofámolaš Toronto filbmafestiválii, mii maid addá vejolašvuođa čalmmustahttit fáttá internašunála dásis ja dan bokte eanet deaddaga bidjat davviriikkaid eiseválddiide mii guoská sámiid gieđahallamii, dadjá Olsen.
