– Lea stuora gudni beassat čájehit iežan vuosttaš filmma «Guovssahas oaidná du» maoriide, lohká Sara Margrethe Oskal.
– Lea stuora gudni beassat čájehit iežan vuosttaš filmma «Guovssahas oaidná du» maoriide, lohká Sara Margrethe Oskal.
Sara Margrethe Oskal lea bovdejuvvon Maoriland Filbmafestiválii Ođđa Selándii čájehit oanehisfilmma «Guovssahas oaidná du – Aurora Keeps an Eye on You». Oskal lea čállán mánusa ja rešisseren filmma, Freedom From Fear A/S ja Mona J. Hoel lea filmma buvttadeaddji.
Filbma čájehuvvui vuosttaš geardde Romssa Internašunála Filbmafestiválas diibmá, ja lea čájehuvvon máŋggaid internašunála festiválain.
– Stuora gudni
Sara Margrethe vuolgá ieš čájehit filmma ja oassálastit festiválii Ođđa Selándii.
– Lea stuora gudni beassat čájehit iežan vuosttaš filmma «Guovssahas oaidná du» maoriide. Sii leat maŋemus áiggiid duođaid bures bargan filmmaiguin. Šaddá miellagiddevažžan vuolgit Ođđa Selándii, ja ovdanbuktit iežan sámi filmma dán dehálaš festiválas.
Ráhkadit filmma doppe
Festivála lea nu liikon su muitaleaddji-jitnii, nu ahte su leat bivdán buvttadit oanehisfilmma festiválas ovttas eará filbmabuvttadeddjiiguin. Guhtta joavkku, main leat golbma filbmabuvttadeaddji geat bohtet iešguđet báikkiin máilmmis, galget 72 diimmus ráhkadit oanehisfilmma mii galgá čájehuvvot festivála loahpaheamis.
Mátkki leat Norgga Filbmainstituhtta, Internašunála Sámi Filbmainstituhtta ja Davvi-Norgga Filbmaguovddáš dorjon.
Mannan vahkku nammaduvvui Sara Margrethe Oskala diktačoakkáldat Davviriikalaš Ráđi girjjálašvuođabálkkašupmái.
