-Almmuhus-
OĐĐASATVuolgá Grüne Wochii oassin ministara delegašuvnnas

Vuolgá Grüne Wochii oassin ministara delegašuvnnas

-

-

Boahtte vahkku vuolgá Ellinor Guttorm Utsi Duiskii Grüne Woche biebmomeassuide oassin eanandoalloministara delegašuvnnas.

Ellinor Guttorm Utsi lea válljejuvvon oassin eanandoalloministara Jon Georg Dale ealáhusdelegašuvdnii Grüne Woche biebmomeassuide Berlinas. Meassut leat boahtte vahkku.

Juohke jagi lea eanandoalloministaris ealáhusdelegašuvdna mielde, mat gieđahallet iešguđetlágan áššiid. Dán jagi lea fáddán báikkálaš biebmoovdánahttin ja mátkeealáhus Norggas dan maŋemuš 20 jagis.

 

Finnmárkku jietna delegašuvnnas

Delegašuvnnas leat iešguđetlágan ealáhussearvvit, fitnodagat ja organisašuvnnat, mátkeealáhussii ja biebmoealáhussii gullevaččat.

Sii galget digaštallat movt ovdánahttit sihke biebmoealáhusa ja mátkeealáhusa Norggas. Mihttun sis lea ahte 2025:s galget báikkálaš biepmut ráhkadit ruhtajođu 10 miljárdda ovddas.

Finnmárkku jietna delegašuvnnas lea Ellinor Guttorm Utsi. Sudnos isidiinnis lea sihke boazodoallofitnodat, ja mátkeealáhusfitnodat. Son lea hui ilus go lea válljejuvvon delegašuvdnii mielde.

– Ovddemužžan smihtten man buorre vuos go boazodoallu ja sámi mátkeealáhus lea oassin našunála barggus. Dan ahte ministtar vel lea mu válljen lea oba buorre. Mearkkaša ahte leat oaidnán ja vuohttán mu, go mus leamašan áiggi čađa beroštupmi dása, lohká Guttorm Utsi.


Davvi Siida fitnodaga eaiggát Ellinor Guttorm Utsi.
Vuorkágovva: Inga Marie Guttorm

Ruhtajohtu galggašii lassánit 10 miljárdii

Delegašuvdna galgá Grüne Woche biebmomárkaniid oktavuođas deaivvadit. Oasseváldit galget digaštallat boahtteáiggi vejolašvuođaid, ja movt olahit mihtu, ahte báikkálaš biepmut galget olahit ruhtajođu 10 miljárdda ovddas gávcci jagi geahčen. Ellinor čilge makkár jurdagat sus leat dán fáttás.

– Mun oainnán ášši guovtti bealde, boazodoalu bealde ja mátkeealáhusa bealde. Mii oaidnit ahte máilbmi háliida oaidnit Sámi, ja boahtit davás, borrat bohccobierggu, ja dalle leat ahtanuššanvejolašvuođat hirbmat stuorrát.

– Muhto mun bijan váruhusa, ahtanuššan gáibida eatnamiid, ja mus lea jurdda ahte eatnamiid ferte áin gáhttet boazodollui. Boahtteáiggis ii sáhte leat boazodoallu jus eai leat eatnamat. Jus álgit ieža gáibidit eatnamiid turistemii, ahte mun galggan bállet siiddastallat turistasiiddain duoppe ja dáppe, de gáržžidan váldoealáhusa, ja die oainnán juo ovtta hástalusa.

 

Olu vejolašvuođat

Ellinor Guttorm Utsi lea maid hástán boazodolliid buktit oaiviliid dán fáttás, go son jáhkká sis leat oaivilat maid ieža eai soaitte oaidnit.

Utsi lohká ahte leat nu olu vejolašvuođat ieža buvttadit buktagiid.

– Jus mii hui duođas smiehttat, mis han leat dat buktagat. Gosa mii jođihat iežamet dulljiid, hui dávjá spilet ja vuovdit hálbái. Gávppiin vuvdet beannot duháhii. Diibmá leimmet hui duđavaččat go čoarvehaddi lei nu badjin, beasaimet vuovdit čorvviid. Sáhttit go ieža váikkuhit ahte čoarvehaddi lassána, jearrá son.

 

Ministtar jođiha čoahkkima

Delegašuvdna galgá olles beaivvi geavahit dan bargui. Juohkehaš galgá ráhkkanahttit smávva ovdanbuktima, ja muđui galget digaštallat movt dan oktasaš mihtu sáhttá olihit.

Dale galgá jođihit delegašuvdnačoahkkima, ja čoahkkima bohtosat almmuhuvvojit seamma beaivvi preassakonferánssas.

Maiddái Eva Nordfjell, Rørøsrein fitnodagas lea mielde delegašuvnnas. Ellinor Guttorm Utsi lea guktii ovdal leamaš Grüne Woche biebmomárkaniin. Dalle son lei ovddasteame Davvi-Norgga, biebmovuovdinbáikkis. 

Dán jagi eai leat Davvi-Norgga fitnodagat Norgga ovddasteame Grüne Woche márkaniin. Dán jagi leat Lulli-Norgga fitnodagat ja biepmut, ja vel vuotnaguovlluin.

-Almmuhus-