Porsáŋggus lea dát oaggungilvu guhkesbearjadaga.
Skoganvarre Vel searvi lágida oaggungilvvu Vuolajohluobbalis guhkesbearjadaga diibmu 12-15. Dán gilvui sáhttá searvat digitálalaččat. Dat mearkkaša ahte sáhtát oaggut vaikko gos, ja sáddet gova guolis man leat goddán dan áiggis go gilvu bistá Vuolajogas. Dat oassi man gohčodit Golleguollin lea dušše Vuolajoga oaggungilvvus ja das leat sierra vuoittut. Bileahtas vuorbádit váldovuoittuid nugo 40. 000 ruvdnosaš skeaŋkakoartta, Icefish tealttá, reaga ja nu ain.
Vuolajohluoppal lea birrasiid vihtta kilomehtera eret biilaluottas Skuvvanváris oarjjás, ja doppe leat lágidan dán oaggungilvvu lagabui logi jagi.
Searvvi bargi Bjørn Balto muitala sii leat lágidan digitála oaggungilvvu juo guokte jagi juo korona geažil.
– Go oinniimet dat doaimmai erenoamáš bures ja vuvddiimet olu bileahtaid, de háliideimmet joatkit dainna vugiin. Ja mis lea ságas lágidit skohtertaksi sidjiide geain ii leat alddiineaset skohter mainna bohtet jávrri ala, dadjá son Ávvirii.
