– Don it leat áidna geas lea beassášluopmu, ja gaskavahku dáhpáhuvvet eanemus lihkohisvuođat johtolagas, muitala Roger Ytre-Hauge.
– Don it leat áidna geas lea beassášluopmu, ja gaskavahku dáhpáhuvvet eanemus lihkohisvuođat johtolagas, muitala Roger Ytre-Hauge.
– Beassášjohtolat manná njuovžilit miehtá vahkku, muhto lea vearrámus gaskavahku mii lea bealle bargobeaivi, muitala Frende Dáhkádusa fágahoavda Roger Ytre-Hauge.
Ovddit jagiid statistihkat čájehit ahte eanemus lihkohisvuođat dáhpáhuvvet gaskavahku ovdal beassášluomu, ja diibmá ledje dieđihuvvon 1132 smávit ja stuorát lihkohisvuođa johtolagas, ja 17 olbmo roasmmohuvve.
Sáhttet eanet lihkohisvuođat dán jagi
Juohke beaivvi beaškkehedje 671 biilla diibmá olles beassážiid.
– Diibmá ledje beassážat guokte vahkku maŋŋel go dál. Dán jagi sáhttá heajut siivu, muitala fágahoavda. 2013i beassážat ledje seamma áigodaga go dál, ja dalle ledje 8 794 lihkohisvuođa, mii lea 2 000 eanet go diibmá, lasiha fágahoavda.
Bivvalis dálki vearrámus
Go lea birrasii nulla gráda, de lea buot njalkaseamos luottaid alde.
– Fertet muitit ahte bisánangaska guhkku. Heivet vuodjima dálkki mielde, rievttes leahtuin ja ale vuoje beare lahka nuppi biilla, rávve fágahoavda.
Várut gálvvuid biillas
Fágahoavda rávve vel gálvvuid bidjat nu ahte eai girdit biilla siste ja roasmmohuhte du dahje earáid jus beaškkehat eará biillain. Jus fertet garrasit goazastit ja leahttu lea 50 km/d, de sáhttá 20 kilosaš seahkka girdit dego 1,25 tonna lossa diŋga.
– Bija losimus biergasiid vuolimussii ja stuolu maŋábeallái, ja bija gitta luovos dávviriid, rávvesta fágahoavda.