Romssa, Báhcavuona ja Karlsøy suohkanstivrrat leat gieskat gárven regiovnna riddoavádatplána, ja das vuoruhuvvo vuhtiiváldit mearrasámi kultuvrra ja birrasa ovdalii go akvakultuvrra álggahemiid. Suohkanat leat dán barggus vuhtiiváldán buot 15 vuosteákka maid Sámediggi lei ovddidan.
– Mearrádus lea vuoitun ja lávki rievttes guvlui mearrasápmelaččaide go mearrasámi árbevirolaš geavaheami árvu ja giliid boahtteáigi deattuhuvvo. Sámediggeráđđi háliida giitit Romssa suohkana buori prošeaktajođiheami ovddas mas mielváikkuheapmi ja rabasvuohta guoskevaš oasálaččaiguin plánaproseassas lea leamaš vejolaš, dadjá sámediggeráđđi Maja Kristine Jåma (NSR).
Sámediggái lea árbevirolaš bivdu dehálaš ja Sámedikki mielas ii galgga rittus nuoskkideapmi. Plánaguovllus leat juo ásahuvvon máŋga čáhcedikšunrusttega, dohko leat dohkkehuvvon 43 čáhcedikšunlokalitehta. Ođđa riddoavádatplánas celko ahte guvlui besset dušše njeallje ođđa lokalitehta ásahit.
– Sámediggeráđđi lea duđavaš go riddoavádatplánabarggus leat háhkan olu dieđuid ja doallan rabas gulahallama. Mii leat maid ilus go Báhcavuona, Romssa ja Karlsøy suohkanat geažuhit ahte árbevirolaš guolásteapmi ja guovllut mat eai leat biliduvvon leat dehálaččat, dadjá Jåma preassadieđáhusas.
Ákkastalle
Sámediggi ovddidii vuosteákkaid riddoavádatplánii go das livččii heajos váikkuhusat sámi kultuvrii ja ealáhusdoaimmaide.
Areálat mat ledje evttohuvvon akvakultuvrii ledje guovlluin gos ovdalaččas leat riiddut, ja mat eai gierdda birasnuoskkideami nu bures. Mearraguovlluid ollislaš deaddu lei maid mearrideaddjin Sámedikki vuosteákkaide riddoavádatplánii.
Sámedikkis lea leamaš viiddis gulahallan suohkaniiguin, iešguđetlágan fágaossodagaiguin, guolástusorganisašuvnnaiguin ja eará relevánta aktevrraiguin plánenproseassas.
– Sámediggi ovddida dušše vuosteákkaid jus leat mearkkašahtti váikkuhusat sámi kultuvrii dahje ealáhusdoibmii. Mii árvvoštalaimet ahte boahttevaš akvakultuvrra ásaheamit Ráinnas, Ruohtnuoris ja Várdnás livččii čuohcat dehálaš árbevirolaš guolástanguovlluide. Báhccavuonas ges lea birrasa vuhtiiváldin dehálaš. Lean ilus go vuosteákkat leat vuhtiiváldon, loahpaha Jåma.
