FA Sápmi lea nubbin iežas puljas maŋŋá go vuoittáhalle Panjabii vuossárgga maŋŋelgaskabeaivvi.
FA Sápmi lea nubbin iežas puljas maŋŋá go vuoittáhalle Panjabii vuossárgga maŋŋelgaskabeaivvi.
FA Sápmi vuittii stuorrát iežas vuosttas čiekčama. Sii vuite Somaliland vuostá 5-0 sotnabeaivvi. Mihttu lei vuoitit pulja ja vuoitit vel Panjab vuostá, muhto nu ii meinnestuvvan.
90 sekundda čiekčan go vuosttaš moalla bođii
Vuossárgga čikče sii puljafavorihta Panjab vuostá, ja vuoittáhalle 1-0. Ii lean mannan go 90 sekundda go Panjab čiekči Gurjit Singh čievččastii spáppa mollii. Dát maid šattai boađusin go duopmár bosádii loahpa čiekčamis.
Nu šattai FA Sápmi nubbin iežas puljas. Dán balai ge Morten Pedersen geavvat ja lei sávvan vuoitit pulja, vai eai fidne nu garra gilvaleaddji njealjádasfinálas.
Duhtavaš vaikke eai vuoitán
Vaikke vuoittáhalle, de Morten Pedersen muitala Ávvirii sii leat duhtavaččat čiekčamiin, muhto eai bohtosiin. Son oaivvilda čiekčan ii čájet rivttes bohtosa.
– Sii ožžo árrat moala 20 mehtera duohken, njuolgga moallačihkii ja mollii. Mis hilgo «offside» vuođul moala vuosttas vuorus. Mii oaivvildat ahte ii lean «offside». Nuppi vuorus mii čiekčat bures, deattu bidjat alladit, leat sin beale šilju ohpihii, muhto eat nagot bidjat moala dáid stuorra vejolašvuođain maid fidniimet, dadjá hárjeheaddji ja joatká:
– Moallavejolašvuođat ledje 4-2 midjiide, nu ahte lean hui duhtavaš gánddaiguin vaikke vuoittáhalaimet, dadjá Pedersen.
Oahppu
Ovdal Panjab čiekčama son muitalii ahte son áigu molsut čikčiid ollu čiekčamis. Son muitala son ii livčče sáhttán bargat maidege eará láhkai go buohkat doibme nu mo galge.
– Øyvind Garfjell ii sáhttán čiekčat dán háve go lea roasmmohuvvan smávvát. Muđui lean njeallje molsuma dahkan goappáge čiekčamis. Gánddat dahket buori barggu, ja buohkat galget oažžut čiekčanáiggi. Mis leat máŋga čiekči riegádan 1999:s, ja dát lea dehálaš oahppu min nuorra čikčiide, dadjá Pedersen.
