Tana BK smávvagánddat besse gitta finálii FeFo-cupas. Finálas vuoiti mearriduvvui liigeáiggis.
Smávvagánddaid finálas deaivvadedje Tana BK ja Sever Murmansk, ja lei nu gelddolaš ahte maiddái stuorra almmáiolbmot biško ja huike.
Čiekčan lei hui dássálaga ja joavkkut barge bures ja lei buorre teknihkka.
Tana BK lei vuoittu bealde čiekčamis guhká ovttain moalain, muhto justa ovdal loahpa, de skorii Sever Murmansk ja šattai liigeáigi finálas.
Sever Murmansk nagodii oažžut spáppa meattá Tana BK moallavávtta ja Tana BK vuoittáhalai Sever Murmanskii 2-3.
Olu áigi spáppain
Tana BK čiekči Dan Øystein Breivik oaivvilda su joavku čievččai bures finálas ja joavkkut čikče hui dássálaga.
– Mii čievččaimet bures, muhto ii doarvái bures. Leimmet hui dássálaga ja goappašat joavkkuin lei spábba olu ja lei vejolašvuohta skoret moalaid, dadjá Tana BK čiekči Dan Øystein Breivik.
Son lei duhtavaš go sii ollejedje finálii, muhto lea beahtahallan go vuoittáhalle Sever Murmanskii.
