Deatnulaš Morten Blien lea masa guokte vahkku bidjan ruoŧŧelaččaid sadjái iežas valáštallamis, mii lea čáhcecrossa. Son lea njulgestaga dán rádjai leamaš birgetmeahttun, juoga maid sávašii leat gaskavahkku go Ruoŧa meašttirgilvvut álget.
Deanu čáhcecrossavuoddji, Morten Blien, dollii mannan vahkkus Ruŧŧii kvalifiseret iežat Ruoŧameašttirgilviide (SM). Dán son nagodii álkit. Gaskavahku lea son áidna Norgalaš guhte lea gilvaleame.
– Lean áidna norgalaš geas lea vejolaš vuoitit, ja nu mun maid áigun dahkat, dadjá Blien.
Vuoitolihkku
Muhto ii leat dušše kvalifisereme maid son lea nagodan fasket dán guovtti vahkkus. Son lea duođas váruhan ruoŧŧelaččaid ahte son lea gearggus vuoitit SM-gilvvuid. Vuos kvalifiseren vuorus son vuittii dán njealji vuoddji badjel geat maid leat kvalifiseren SM-gilvvuide gaskavahkku. Dan gaska lea son vel vuoitán gilvvuid lillhardal ja Åsele báikkis. Vuoddjit ruoŧabeale čállet vel son lea masa jo birgetmeahttun.
– Leamaš hui buorre álgu dáppe. Vuos nagodin kvalifiseret SM-gilvvuide. Lean beassan iskkadit dan dási go vuiten njeallje buoremus vuoddji badjel geat maid leat kvalifiseren SM-gilvvuide. Seammás vuiten bearjadaga ja lávvardaga gilvvuid, mat eai lean stuora gilvvut, muhto lei buorre hárjehallat ja ledje buorit vuoittut, dadjá Blien.
Vuoitit
Gaskavahku álgá SM-gilvu Likšus Ruoŧas. Diibmá son gárttai njealjádin gilvvus maŋŋá go vuojui skohteriin, mii dagaha vuoitogoikku stuoribun go ovdal.
– Diibmá vudjon áibba álggus go guoskkehin muhtin vuoddjái, ja nu manahin de vejolašvuođa vuoitit. Ferten váruhit amas geavvat seamma bártái, go juo lean vuolgán vuoitit ja áiggun maid vuoitit, dadjá Blien ja joatká muitaleames livčče seamma buorre dušše lávggodit ruoŧa ábiin jus vuoitojurdagiin ii vuolgge gilvalit.
Gulul
Gaskavahkkui son lea ráhkkaneamen olles leavttuin. Son ja bearaš leat jo ollen Likšui. Otne galget doalvut skohtera čájáhussan gilvobáikái ja formálalaš áššiid vel doaimmahit ovdal gilvvu.
– Dál lea hui gulul váldit ovdal gilvvu. Na in gusto nu gulul. Skohterboagán mas dat manai, otne olle ođđa boagán. Veahá skruvven barggut vel, vai rivttes leaktu boahtá. Lea veahá njoahci skohter go vuolgit galggan, dán ferte njulget vai rivttes leahtu oaččun, dadjá Blien ja joatká:
– Dás go gearggan de dollen Avvilii. Doppe leat boahtte vahkkoloahpa stuorámus čáhcecrossa vuodjimat. Vuiten diibmá ja mihttu lea dán jagi maid vuoitit dan. Vuoitomiella lea stuoris, dadjá Blien movttegit.
Vuoitu SM-gilvvus lea 20 duhát ruoŧa ruvnnu.
