Bargiidbellodaga sámediggejoavku oaidná hirbmat dárbbašlažžan sihkkarastit riddo- ja vuotnaguolásteddjiid vuoigatvuođaid. – Guolástuspolitihka váldoulbmil galgá sihkkarastit ahte guolásteaddjit besset bivdit iežaset lagasbirrasis, cealká Vibeke Larsen.
Mannan basiid doalai Finnmárkku Bargiidbellodat jahkekonferánssa. Sámediggejoavkku áirasat ledje erenomáš áŋgirat go lei sáhka guolástuspolitihkas.
Máhcahit guolleeriid
Ronny Wilhelmsen ovddidii sámediggejoavkku evttohusa geahpedit stuorát fatnasiid eriid ja máhcahit eriid riddoguolásteddjiide. Dasa lassin berre árvvoštallat movt eriin galgá dahkat jus fylkka čanastagat jávket. Dasa lassin evttohuvvui ahte ii eisege galgga dohkkehit struktureret fatnasiid mat leat oanehat go 11 mehtera.
– Finnmárkku Bargiidbellodat doarjjui buot dáid evttohusaid, mii čájeha ahte lea nana ovttaoaivilvuohta geavahit reaidduid mat nannejit Finnmárkku guolásteddjiid boahtteáiggi. Fylkkabellodat maid mearridii ávžžuhusa doalahit oassálastilága ja guollevuovdinlága, čállá Bargiidbellodaga sámediggejoavku preassadieđáhusas.
Bargiidbellodaga Vibeke Larsen. Vuorkágovva: Astrid Helander.
Dáhttot seailluhit luossabivddu
Sámediggejoavku maiddái cuiggodii ja čilgii man dehálaš mearraluossabivdoealáhus lea, ja muitalii man olu ealáhus mearkkaša mearrasámi kultuvrii. Fylkkabellodagas lea nana dáhttu seailluhit ja ovdánahttit dán luossabivdu.
– Bargiidbellodaga sámediggejoavku lea duhtavaš go Finnmárkku Bargiidbellodagas lea seamma beroštupmi vuhtii váldit riddo- ja vuotnaguolásteddjiid beroštumiid, nu go sámediggejoavkkus lea, loahpaha parlamentáralaš jođiheaddji Vibeke Larsen
