Boazodoalli Lars Ante Oskal lohká leat váivin oaidnit čoakčáid go ohkoladdet misiideaset maid leat massán boraspiriide.
Boazodoalli Lars Ante Oskal lohká leat váivin oaidnit čoakčáid go ohkoladdet misiideaset maid leat massán boraspiriide.
Eske iđđes gávnnai Lars Ante Oskal vuot ruksesmiesi man navdá leat goddon goaskimii.
– Oidnen dies lei áldu ohkoladdamin ja mun árvidin mo lea geavvan. Nu rokkastin telefuvnna vai beasan dokumenteret ja čájehit earáide, muitala Oskal.
Son gullá Stálonjárgga orohahkii mii lea Divrrát suohkanis Tromssas. Skoaddovárrái, gos gávnnai ge miesi mii filmmas oidno, ledje golbma álddu guoddán maŋimuš jándoris.
– Álggos gávdnen dán miesi man filbmejin, dasto gávdnen vel dan nuppi. Dan goalmmáda gal in oba gávdnan ge, čilge Oskal.
Dákkáriid lea Oskal masá hárjánan jo oaidnit, muhto ii liiko gal.
– Dat gal lea váivi oaidnit go čoakčát ohkoladdet.
Geahččalit várjalit
Oskal muitala iežaset orohagas massit olu misiid giđđat, vaikke sis leat ge buori vuoimmis bohccot.
– Mii leat golmmas geat vuodjit birrajándora dál, ja gávdnat sullii 4-5 miesi beaivái, muitala boazodoalli ja lohká iežas massán badjel 30 proseantta misiid diibmá.
Siidaguimmežagat geahččalit dál doallat ealu nu čoahkis go nagodit.
– Buoremus livččii dieđusge diktit daid lávdat, muhto šaddat doallat čoahkis ja geahččalit várjalit ealu goddomis boraspiriide. Muhto eat mii nagot várjalit go áimmu mielde bohtet, dadjá Oskal.
LOGA MAID:
Davvi-Norggas eanemus goaskimat
Lars Ante Oskal ii jáhke gal boraspirevahágiid oažžut njiedjat eará go geahpedit boraspiriid.
– Galggašii beassat báhčit maiddái goaskimiid, go dat leat maid oalle olu álgán šaddat, oaivvilda son.
Bivdu ii lihkostuvvan
Ieš lohká dán goaskima speadjan jo diibmá. Dalle orohat oaččui báhčinlobi, muhto goaskimiid fertejit erenoamáš bivdit báhččit.
– Badjeolbmot eai oaččo ieža báhččit goaskimiid, go mii eat dovdda erohusa mearra- ja gonagasgoaskimiin, dan dadjet goit ieža eiseválddit. Nu fertejit leat sierrabivdit, muitala Oskal.
Nu bohte ge Stálonjárgii maid goaskinbivdit diibmá, maŋŋil go Tromssa Fylkkamánni lei addán báhčinlobi. Lohpi bisttii guokte vahkku, muhto ii buktán bohtosiid.
– Dat ádjánedje veaháš gávdnat bivdiid geain lei dat gealbu. Nu eai ožžon bivdit dieđu ovdal go lohpi lei nohkamin jo, sii bohte bearjadaga ja besse de bivdit lávvardaga ja sotnabeaivvi nogai lohpi. Eai dat ollen gávdnat dan goaskima, čilge Oskal.
