Mázes dollojit válgadoalut vuosttaš geardde suohkanválggaid oktavuođas.
Mázes dollojit válgadoalut vuosttaš geardde suohkanválggaid oktavuođas.
Mázes leat muhtun ráje suohkanválgga listoevttohasat čoagganan válgabáikki olggobeallai, gos lágidit válgadoaluid ja leat ságastallan jienasteddjiiguin ja guossohan sidjiide borramuša ja juhkamuša. Johttisápmelaččaid listu, Bargiidbellodat, Ovddádusbellodat ja Sosialisttalaš Gurutbellodat dat ledje oktasaš válgabáikki ráhkadan.
Humadit beassat
Johttisápmelaččaid listtu njealját evttohas, mázelaš Hans Ole Eira, muitala son háliidii ahte Mázes maid galggaše válgadoalut.
– Mu muittu mielde eai leat ovdal lágiduvvon válgadoalut Mázes. Lea hui vuogas ahte olbmot besset bisánastit ja humadit evttohasaiguin, ja jugistit veahá gáfe ja borralit juoidá, lohká son.
Ávkin
Eira muitala sii, mázelaččat, deaivvadit dávjá Mázes, muhto eat nu dávjá humat politihka birra.
– Dainna lágiin beassat mii evttohasat gullat maid Mázelaččat oaivvildit áššiid birra, ja dat lea maid ávkin jus mii válljejuvvojit suohkanstivrii, lohká son.
