Beaivváš lea fitnan Stuoradikkis muitaleame ođđa teáhtervistti dárbbuid birra.
Beaivváš Sámi Našunálateáhter čállá preassadieđáhusas ahte sii leat dal vuohččan ožžon saji Bearaš – ja kulturkomitea stádabušeahta rabas gulaskuddamii.
Mánnodaga beasaiga stivrrajođiheaddji Lene Hansen ja teáhterhoavda Rolf Degerlund muitalit sidjiide ođđa teáhtervistti dárbbuid birra. – Eallit dahje ii eallit, lea jearaldat. Dál lea hui dehálaš ahte Stuoradiggi ražasta dahkat loahpalaš mearrádusa reviderejuvvon stádabušeahtas 2020 giđa. Dál leat vuordán doarvái guhká, lohká teáhterhoavda Rolf Degerlund preassadieđáhusas.
Historjjálaš mearrádus
Teáhtera váldoákkastallan lei ahte dás livččii ihána vejolašvuohta stuorradiggeáirasiidda ovttas dahkat historjjálaš mearrádusa mii čohkke Norgga kulturnašuvnna. – Dát galgá leat boahtteáiggi visti, Sámi nuoraide. Sii galget rámiin beassat loaiddastit magihkalaš vistái, dadjá Degerlund. Preassadieđáhusas son meroštallá ahte visti galgá gárvvis juo 2024:s, muhto de berre loahpalaš mearrádus leat juo 2020:s.
Válde vuhtii
Preassadieđáhusas boahtá ovdán ahte stivrrajođiheaddji Lene Hansen lea hui duhtavaš go teáhter vuohččan lea beassan gulaskuddamii.
– Dađistaga leat mii gulahallagoahtán buorebut eisseválddiiguin, ja dovdu lea hui buorre. Sii vuhtiiváldet min ákkastallama, ja Statsbygg lea bargan vuđolaš barggu dán ovttas huksema čielggadeamis Sámi joatkka- ja Boazodoalloskuvllain, geaiguin mis maid lea hui buorre ovttasbargu. Dál dárbbašit dušše politihkkáriin veahki vai huksen ollašuvašii, loahpaha Hansen preassadieđáhusas.
