-Almmuhus-
-Almmuhus-
-Almmuhus-
OĐĐASATVuodján ođđa gárddi čađat čađa

Vuodján ođđa gárddi čađat čađa

-

-

Militearahárjehallama «Joint Viking» oktavuođas, mii dál lea jođus Finnmárkkus, leat vuodján Fiettar orohaga ođđa gárddi Áisaroaivvis máŋgga geardde čađa.

Fiettar orohat leat diibmá geargan ceggemis ođđa gárddi,maid atnet sihke giđđat ja čakčat ja mainna leat guhkit áigge ádjánan cegget.

– Lea diehttelasat stuora vahát midjiide, ja dál vuordá ollu bargu masa ferte bidjat návccaid divodit gárddi ovdal go sáhttit gárddástallat, lohká orohaga ovdaolmmoš Ann Catharina Lango.

 

Eai leamaš geahččame

Lango lohká sii eai leat vel leamaš geahččame movt Suodjalusa hárjehallan lea billistan gárddi, go leat dušše gullan earáid bokte ahte gárdi lea máŋgga sajis veallut.

– Dat lea min geasseorohagas, eat ge leat doppe fitnan dál dálvet. Danne dieđusge ii čuoza midjiide juste dál, muhto livččii vuogas jus Suodjalus dieđihivččii ahte leat billistan.

 


Fiettar orohaga ovdaolmmoš Ann Catharina Lango muitala ahte sii soaittáhagas gulle billistemiid birra. Vuorkágovva: Ovlla Gaup

 

 

Soaittáhagas bohte diehtit

Lango muitala sii leat diehtán ahte «Joint Viking» galggai čađahuvvot ja lohká militearahárjehusaid lea dehálaš doallat ja ferte juoga sajis dollot, go lea riikka álbmoga sihkarvuođa ovddas. Son lohká sii soaittáhagas gulle dien birra, ja jus eat livčče gullan maidege, de livččii leamaš oalle unohas boahtit fas dohko.

 

Áigot gokčat goluid

Fiettar orohat leatge ieža váldán oktavuođa Suodjalusain, ja ožžon dieđu ahte maŋŋel hárjehallama, mii loahpahuvvo njukčamánu 15. beaivvi, de galget vuolgit fárrolaga geahččat billistemiid guovllus.

– Sii leat lohkan ahte gokčet buot goluid maid sii leat vahágahttán, maid mii ovttas galgat vuolgit geahččat, lohká Lango.

 

Ferte jođánit dieđihit

Suodjalusa preassavákta, oberstløytnánta Ivar Moen, čilge ahte jus geavvá nu ahte sii leat billistan maidege hárjehallamis, de ferte dieđihit sin vahátnummarii nu jođánit go vejolaš.

– Dan dihte go lea dehálaš midjiide duođaštit duohta vahágiid, ja dat ferte dahkkot jođánit go mii maid fertet diehtit makkár ossodat lea vahágahttán, lohká son.

 

Lea go nu ahte Suodjalus hárjehallá duohta soađi ja ehpet váldde nu ollu vuhtii mii luonddus lea?

– Ii leat nu, go mii geahččalit hárjehallamis nu bures go sáhttit váldit vuhtii luonddu ja birrasa, nu ahte vahágahttet unnimus lági mielde, lohká Moen.

 

– Ollugat dieđihan

Moen muitala sii leat ovdagihtii sádden buot viesuide suohkaniin diehtojuohkima, ja muđui berošteddjiide nu movt ásahusaide ja boazodoalloorohagaide. Son čilge ahte sii leat maid doallan čoahkkimiid guovvamánus gos lea leamaš dárkilis diehtojuohkin hárjehallama birra.

– Danne lea veaháš imaš go orohat ii leat ožžon dan mielde, go Suodjalusa vahátnummarii leat ollugat dieđihan vahágiid maid Suodjalus lea dahkan, lohká Moen.

-Almmuhus-