Guovdageainnus balahit muhtima vuodján gárrenoaivvis ja Várggáin šadde politiijat doalvut 15-jahkásačča ruoktot go lei beare gárremin. Dá lea mannan ija politiijalogga.
Guovdageainnus balahit muhtima vuodján gárrenoaivvis ja Várggáin šadde politiijat doalvut 15-jahkásačča ruoktot go lei beare gárremin. Dá lea mannan ija politiijalogga.
Nuorta-Finnmárkku politiijat bissehedje badjelaš gaskaija áigge muhtin biilavuoddji gean balahit vuodján gárrenoaivvis. Biilavuoddji dolvojuvvui dearvvašvuođaguovddážii válddihit varraiskosiid.
Buollinalárbma
Twitteris dieđihit Nuorta-Finnmárkku politiijat maiddái ahte Álttá Amfi-gávpeguovddážis njurgugođii buollinalárbma mannan ija diibmu 01:45. Čájehuvvui ahte gávpeguovddážis ii lean buollin.
Váilo rusttegat
Hámmárfeasta politiijat bissehedje otná čuovgáneapmái golbma biilla bearráigeahčus, politiijat čálle golbma sáhku go biillain váilo rusttegat.
Badjelmeare gárremin
Várggáin lei 15-jahkásaš bárdni badjelmeari gárremin, politiijat dolvo bártni ruoktot. Girkonjárggas ges válde 55 jahkásačča háldogiddagassii go lei beare gárremin, almmái ii vuollánan guođđit olgobáikki ja danin fertejedje politiijat boahtit, dieđihit Nuorta-Finnmárkku politiijat Twitteris.
Guorbmebiila doaresbeallái
Ikte eahkedis vujii muhtin olgoriikkalaš guorbmebiila badjel geainnu Sieiddás, Deanus. Ii okta ge roasmmohuvvon lihkohisvuođas.
