-Almmuhus-
KULTUVRAVuodjá 3300 kilomehtera beassášfestivála dihte

Vuodjá 3300 kilomehtera beassášfestivála dihte

-

-

20 diimmu biillas čohkohallat beassášfeasttaid geažil, dan dat gal Stigo Holm álkit dahká.

– Dat leat dušše dat beassášmárkanat dieppe davvin mat geasuhit. Olmmoš háliida juohke jagi vásihit daid, muhto dán jagi in jáhkkán gal šaddat daidda searvat, muitala Stigo Holm.

Son lea Sirpmás eret, muhto orru beaivválaččat Norgga oaivegávpogis Oslos. Juohke beassážiid láve son máhccat Sápmái ja dáppe ávvudit daid maid ieš gohčoda sámi stuorámus dáhpáhussan.

– Beassášmárkanat leat sámi stuorámus ja somámus márkanat. Dalle deaivvada buot oahppásiiguin. Olu olbmot čoagganit konsearttaide ja olusat leat boahtán ruovttubáikkiideaset, lohká son.

 

– Ii lean doaivva ge

Dán jagi dattetge ii jáhkkán gal Stigo beassat Sámis ávvudit beassážiid, ja lei jo ráhkkanišgoahtán vuosttaš geardde vásihit gávpotbeassážiid Oslos. Son muitala ahte girdibileahtat ledje divrasat go ii lean árabut diŋgon ja nu ii lean doaivva joavdat Sápmái dán vuoru gal:

– De moadde beaivvi áigi riŋgii mus almmái, Ivvár Máhtte Eira Strand, ja jearai makkár beassášplánat mus leat. Go de leimme veaháš háleštan de jearralii ahte ean got moai vuojaš Guovdageainnus. Mun in dárbbašan gal jurdilit ja vástidin dalán ahte de vulge, čaibmá Stigo.

 

Albmáguovttos leaba rehkenastán ádjánit birrasii 20 diimmu vuodjit Oslos Guovdageidnui, ja diehttelasat seamma guhká go jorggiheaba sotnabeaivvi. Dahje vuossárgga, eaba leat oainnat vuos mearridan nu juste goas jorggiheaba fas oaivegávpogii.

Go Ávvir jearrala eaba go bala dolkat nubbi nubbái, go nie guhká galgaba ovtta biillas čohkkát, de gal Stigo čaibmá:

– In mun jáhke, dat gal manná bures. Guhkes tuvrrat han lávejit hui fiidnát. Čáppa dálkin dat gal lea fiinnis vuojašit.

 

Juohke jagi vuodján

Son muitala iežas maŋimuš vihtta jagi vuodján oaivegávpogis Guovdageidnui beassášfestiválii.

SMF Buvttadeaddji konseartacavgileamit:

– SGP:i dán jagi šaddá hui erenoamáš vásáhussan. Doppe čuojaha Per Tor Turi vuosttaš geardde ođđa luođi masa lea musihkka biddjon. Vuosttaš geardde go gullen dan, de vuovttat ceagganedje ja dat šuokŋa darvánii oalát. Grand Prixas čuojaha maid Jon Henrik Fjällgren «Manne leam frijje» šuoŋa, muhto SGP:s beassabehtet dan gullat ođđa hámis, nu ehpet leat dán gullan ovdal, muitala Nils Johan Vars.

 

– Diibmá gal ledjen oastán girdibileahta, muhto vuvden dan soapmásii gii dárbbašii bileahta ja ieš njuikejin muhtun albmá mielde biillain davás.

Beassášbottas áiggošeigga albmáguovttos ollet olu:

– Na dieđusge áigo Guovdageainnus fitnat konsearttain ja nu, muhto galggašin maid ollet Sirpmás fitnat ruovttus. De galggašii jávrre alde geargat fitnat oakkasteamen ja miella livččii maid Kárášjogas fitnat konsearttas. Muhto ferten oaidnit maid gearggan, čaibmá Stigo.

 

Liiko gullat

Sámi Musihkkafestivála (SMF) buvttadeaddji Nils Johan Vars gal liiko gullat guhkesmátkálaččaid birra: 

– Wow, de gal dajan. Diet dáidiba leat dat geat guhkimusat vánddardeaba biillain deike, lohká Vars.

Son lohká diehtit ahte beassášfestivála lea hui geasuheaddji.

– Muhto lea álot hui somá gullat ahte olbmot vulget dien mađe guhkkin deike.

 

SMF BUVTTADEADDJI KONSEARTACAVGILEAMIT:

– Mun maiddái illudan Isac Elliot konsertii, šaddá várra seammalágan hysteriija go diibmá ge. Lea hui somá mánáide ja nuoraide beassat fállat dakkár konseartavásáhusa mat mis eai lean go leimmet dien agis.

 

Vars lea Báktehárjjis go Ávvir čuojaha sutnje, son muitala alddis dál leat vel moadde diimmu bosihit ovdal go šaddá albma hušša.

– 11 áigge bohtet vuosttaš SGP artisttat hárjehallat ja dan rájes álgá hušša mii bistá gitta lávvardahkii. Olmmoš illá láve muitit vuoigŋat ge ovdal go maŋimuš konsearta lea nohkan, čaibmá son.

(Ášši joatká gova vuolábealde)


Sámi Musihkkafestivála buvttadeaddji Nils Johan Vars illuda gullat ahte bohtet festiválaguossit biillain gitta Oslos.
Govven: Sara Maret Ravdna Oskal.

Leamaš lossat ja váivi

Son muitala ráhkkaneami leamaš sihke somán, muhto maid veahá lossadin.

SMF BUVTTADEADDJI KONSEARTACAVGILEAMIT:

– Beassášlávvordaga-konsertii maid illudan, gos čuojaheaba diimmá Grand Prix vuoitit. Mun dovddan ahte dál ollašuhttit dan mii lea ulbmil das go vuitiide addo fálaldat doallat konseartta maŋit jagi. Jurddaš dál beassaba diimmá vuoitit čuojahit sámi stuorámus lávddis, dan stuorámus eahkeda.

– Ferten mieđihit ahte ovtta gaskka lei hui deaddu SMF ja mu vuostá go buot šiehtadusat eai lean gárvásat eat ge beassan almmuhit prográmma, earát ledje jo áigá almmuhan iežaset doaluid. Dat lei hui váivi ja lossat ja

gaskkohagaid eahpidin ahte lean go riekta oba bargamin ge, muitala Vars rahpasit.

Prográmma goittot ge gárvánii.

– Dat šattai jalla buorre prográmma. Jurddaš, Guovdageidnui bohtet birrasii 100 artistta, birrasii 70:s dain gullet midjiide ja dat galget buohkat čuojahit dáppe njealji beaivvis. Dat lea oalle erenoamáš.

 

 

-Almmuhus-